Naalakkersuisoq naqqiivoq: Pillaanermi sinaakkutit sukannernerulersitsinavianngillat
Kalaallit Nunaanni pinerluttulerinermik inatsit ajorpoq nutarterneqartariaqarlunilu.
Siunnersuutit marluk inatsisartunut ilaasortat upernaaq manna eqqartugaat taama siunertaqarput.
Inatsisit Atuutsinnneqarnerannut Naalakkersuisup Naaja H. Nathanielsenip oqallinneq iluarisimaaraluarlugu, kukkusumik naatsorsuuteqartoqarnera pissutsinillu paatsuuisoqartarnera oqallinnermi annertuallaarsorai.
Pinerluttulerinermik inatsimmi pillaanermik sinaakkusiisalernissamik Siumup siunnersuuteqarnera assersuutigaa. Pinerlunnerni assigiinngitsuni aalajangersimasumik pineqaatissiissoqartalernissaa partiip siunnersuutigaa.
- Taamaaliortoqarsinnaagaluarpoq kisianni periutsinik allannguingaarnavianngilaq. Pillaanermik inatsimmi aamma pinerluttulerinermiik inatsimmi, eqqartuussuummik naliliiniarnermi isiginiginiassat assigiikannersunik malittarisassaqarnerat tamatumunnga peqqutaavoq, taanna oqarpoq.
Pinerlunnerni assigiinngitsuni pineqaatissiissutit assigiinngitsut sakkortussusaat pillugu politikkikkut ersersitsinissaq, pillaanermik sinaakkutsinik siunnersuuteqartup Kuno Fenckerip siunnersuuteqarnermigut anguniaraluarpaa.
Taamaaliornerli ersarissumik kinguneqarnavianngitsoq Naaja H. Nathanielsen isumaqarpoq.
- Pineqaatissiissutissamik nalilersuinermi assigiinngitsunik pingasunik aallaaveqartarneq allanngortinneqarnavianngilaq. Taakku tassaapput pinerluutip peqqarniissusaa, eqqortuliortoqarneranik misigineq aamma pinerluuteqartup inuttut inissisimanera.
Eqqartuussutit sakkortunerulernavianngillat
Sakkortunerusumik pineqaatissiisoqartarnissaanik kissaateqarneq, politikerinit arlalinnit oqallinnermi oqariartuutigineqarpoq.
Pillaanermillu inatsiseqalernissamut Demokraatit siunnersuuteqarneranni tamanna aamma siunertaaavoq. Inunnut pinerliinerit soorlu kinguaassiutitigut innarliinerit, nakuusernerit, toqutsinerit toqutseriarnerillu sakkortunerusumik pillaavigineqartarnissaat Demokraatit anguniarpaat.
Siunnersuutilli arlaannaalluunniit sakkortunerusumik eqqartuussisoqartalernerannik qulakkeerinavianngitsut Naaja H. Nathanielsen naqissusiivoq.
- Sakkortunerusumik pineqaatissiisoqartalernissaa kissaatigineqarpat taava eqqartorneqartussat allarluinnaapput. Pillaanermik sinaakkusiinikkut anguneqarnavianngilaq. Taakku marluk assigiimmik ilaatigut isigineqartarnerat inatsisartuni oqallinnerup tusarnaarnerani arlaleriarlugu maluginiarpara, kisianni pissutsit piviusut taamaanngillat.
Sakkortunerusumik pineqaatissiisalernissamut kissaateqarnermut, Naaja H. Nathanielsen akerliunngikkaluarpoq.
Pineqaatissiinermi killiliussap ukiunit quliniit 16-inut sivitsorneqarnissaa anguniarlugu Naalakeersuisut danskit naalakkersuisuinut kissaateqarlutik saaffiginnissuteqareersimanerat, taassuma ilaatigut tikkuarpaa.
Pissutsinillu manna taputartuussinnginnissaq oqariartuuteqarnermini siunertarigini Naaja H. Nathanielsenip oqaatigaa.
- Pillaanermik sinaakkusiinerup sakkortunerusumik pillaanermut assersuunneqannginnissaa pingaaruteqarsoraara. Kukkusumik inerniniliineruvoq oqallinnermi ilaatigut nalinginnaasutut isigineqalersartoq.
Danskit inatsisaat imaluunniit kalaallit inatsisaat?
Pillaanermut inatsit pillaanermilu sinaakkutit danskinit periuserineqartut, inatsisissatut siunnersuutit pillugit oqallinnermi aallaavigineqarnerat aamma iluaqutaangitsoq Naaja H. Nathanielsen isumaqarpoq.
- Inatsisitta ilumut taamaattussaanerata misissorneqarnera ajornartorsiutitut isiginngilara, soorlu taama oqareersunga. Naalakkersuisuulluta taamaaliorniarnerput aamma oqaatigereerparput. Eqqortumilli nalilersuisoqatarnissaa anguneqassappat inuuttaasut isumaasa paasinissaat aamma kissaatigaarput.
Danskilli inatsisaanik atuilernikkut tamanna anguneqarnavianngitsoq taanna isumaqarpoq.
- Danskit inatsisaat Kalaallit Nunaannut nuuginnarneqassappata pisuni assigiinngitsuni sakkukinnerusumik pineqaatissiisoqartalissaaq. Ikiaroornartunik tigummiaqarnarmut tuniniianermullu pineqaatissiissutit assersuutaasinnaapput, nunatsinnimi Danmarkimut sanilliullugu sakkortunerusumik pineqaatissiisoqartarpoq.
- Nakuusernerit kinguaassiutitigullu innarliinerit annertuumik ajornartorsiutaapput, isumaqarpungalu ajornartorsiutitsinnut unammilligassatsinnullu naapertuuttunik pineqaatissiisoqartassasoq. Taamaammat nunani taakkunani marlunni assigiimmik pinnittoqartariaqanngilaq.
Naaja H. Nathanielsenilu isumaqarpoq, inatsisissatut siunnersuutit taakku siunertaat ersareqqissaartumik politikerinit ilisimaneqartariaqartut, siunertaasalu anguneqarnissaannut iliuuserineqartussat aamma ilisimaneqartariaqartut.
Siunnersuutit taakku marluk Inatsisartut Inatsisinut Ataatsimiititaliaanut ingerlateqqinneqarput.
