Netanyahu: Israel Gazamut tamakkiisumik sakkutuulersungajalerpoq

Israel Palæstinami eqimattamut Hamasimut ajugaaniarluni ulluni aggersuni "tamakkiisumik sakkutuulersorniarpoq".

Nutaarsiassaqartitsivik AFP-p allaaserisaa naapertorlugu Isrealimiut ministeriunerat, Benjamin Netanyahu nalunaarummi marlunngornermi oqarpoq.

- Ulluni aggersuni sakkutuut tamakkiisut atorlugit suliaqarniarpugut. Tamakkiisumik suliaqarneq Hamsip ajugaaffiginissaanik isumaqarpoq, Netanyahu ministeriuneqarfiup allaffianit nalunaarummi oqarpoq.

- Pisunik pissuteqartumik sorsunnermik unitsitsinavianngilagut. Akiuukkunnaarallartoqarsinnaavoq, kisianni ajugaanissatsinnut ingerlarsussaagut.

Israelimi naalakkersuisut nunanik Gazamit palæstinamiunik tiguserusussinnaasunik piffissami matumani ujartuileruttortoq Israelip ministeriunerata nalunaarummi tassani aamma oqaatigaa.

- Gazami innuttaasunut nunamit anerusuttunut aaqqiissunermik pilersitsivugut, kisianni nunat taakkuninnga tiguserusussinnaasut pisariaqartippagut, Netanyahu nalunaarummi oqartoq, AFP allappoq.

Ikiueqqaarnermut mattussisut

Taassuma oqarnera naapertorlugu innuttaasut "50 procentii sinnerlugit" sumiiffimmik periarfissaqassagunik qimakkusuppaat.

Israelimiup-amerikamiup tiguagaaqqasup Gazamit iperagaanerata aqaguani Netanyagu taama nalunaaruteqarpoq.

BBC-p allaaserisaa naapertorlugu ippassaani iperaasoqarneratigut Gazami 2023-mi oktobarimili tiguagaasunit 251-init 58-it suli tiguagaaqqapput.

Hamasip oqarnera naapertorlugu tiguagaaqqasumik iperaaneq sakkuaakkunnaarnissamut isumaqatigiinniarnerit uterfigeqqissinnaanissaannik ammaassaaq.

Netanyahulli iperaaneq sorsunnermut unitsitsinissamut atatillugu sunniuteqarnaviannginnerarlugu kingornatigut itigartitsissutigaa.

Israelip sakkuaakkunnaaqqaneq qaammatinik marlunnik sivisussuseqartoq marsip 18-ianni unitsippaa, Gazamullu qaartartumeerinini annertusillugu.

Israelillu tamatuma kingorna ikiueqqarnerit aamma mattuppai, sorsuffiusumilu kaannersuaqaleratarsinnaaneranik aarlerisaaruteqarneq annertusivoq.

/ritzau/