Kattuffiit ikummatissat akitsornerat iluarinngeqigaat
Ikummatissat tassa, benzinap, dieselip petroleumillu literimut akii ullormit ullormut marlunngornermit 85 oorimik tamarmik akisunerulerput. Tamanna 15-20 procentillu akornannik akisunerulerpoq.
Akitsuineq Inatsisartunut qinigaarlaat isornartorsiorneqaatigaat. SIK-mmi siulittaasua nuannaanngeqaaq.
- Qineqqusaaramik innuttaasunut neriorsuutertik tassalu inuuniarneq pitsaanerulissasoq, atugarissaarnerulissasugut, oqinnerulissasoq ulluinnarni inuuniarneq taamatut massakkut iliortoqanngilaq, Jess G. Berthelsen KNR-mut oqarpoq.
SIK: Salloqittaavusi
Taassuma neriorsuutit iliuutsillu assigiinngimmata tamanna salluliornertut isigaa.
- Salloqittaaneruvormi. Qineqqusaaramik tamarmik qineqqusaarput inuuniarneq maani nunatsinni oqinnerulissasoq. Atugarissaarnerulissasugut. Massakkulli killormorluinnaqqissaaq iliortoqarpoq, SIK-p siulittaasua oqarpoq.
Siulittaasup isumaa naapertorlugu Inatsisartunut ilaasortat qaffaatip matussutissaanik ujarlertariaqarput. Innuttaasummi akisunerusumik orsussarsisarnissaat sulisartut siuttuata akuerisinnaanngilluinnarpaa.
- Aningaasanik ujarlerniarlik, taassumalu qaffaassutip matussuserneqarnissaa isumagalugu, taanna oqarpoq.
KNAPK: Siooranaq
Jess G.Berthelsen kattuffiit siulittaasuanni isornartorsiuisuni kisimiinngilaq.
KNAPK-p siulittaasua, Nikkulaat Jeremiassen, akitsuinermut aamma nuannaarutiginninngilluinnarpoq. Ikummatissammi akitsornerat kattuffiup ilaasortaanut pitsaanngitsumik kinguneqartussanngortoq naatsorsuutigaa.
- 1 kronengajassuarmik ingerlatissap ikummatissallu qaffannerat inuiaqatigiinnut minnerunngitsumik ilaasortatsinnut sunniutissai ernumanarlutillu siooranarput, Nikkulaat Jeremiassen oqarpoq.
Ikummatissat qularnaarnerat akisunerummat akit allanngortinnissaat pisariaqartoq, KNI tusagassiorfinnut nalunaarpoq. KNR-ip tassanngaanniit apersuinissaq sulissutigaa.
KNI Namminersorlutik Oqartussat pigaat. Ingerlatseqatigiiffiuvoq Naalakkersuisulli Siulittaasuata Naalakkersuisoqarfiata ataani inissisimavoq.
