Nuummi pineqaatissinneqarsimasunut inissiisarfiup ulikkaaqqanera Europap Siunnersuisoqatigiivinit isornartorsiorneqartoq
Nuummi pineqaatissinneqarsimasunut inissiisarfik nutaaq, Ny Anstalt, 2019-imi ammarneqarmat illussanik titartaasarnikkut sinaakkutit inissinneqarsimasunut 76-inut inissaqartitsisut nersualaarneqarput.
Maanna ukiut arfinillit qaangiuttut inissiisarfik ima ulikkaartigaaq allaat Europap Siunnersuisoqatigiivisa Naalliutsitsisarneq pillugu Ataatsimiititaliaata isornartorsiorlugu.
Inissiisarfiup ulikkaaqqaneratigut inissinneqarsimasut marluk ineeqqami ataatsimi inissinneqartartut, ataatsimiititaliaq januaarimi tikeraareerluni nalunaarusiami nutaami allappoq.
Tamanna isornartoq, IA sinnerlugu Folketingimut ilaasortaq Aaja Chemnitz oqarpoq.
- Ataasiarluta inissinneqarsimasumit inuusunnermit utoqqaanerusumut inissinneqarsimasumut innarliisoqarneranik nalaataqarpugut, tamannalu ineeqqamik avitseqatigiinnerannik pissuteqarpoq, taanna oqarpoq.
Inissinneqarsimasut ilaat arlallit piffissaligaanngitsumik tigummigallarneqartussatut eqqartuunneqarnikuupput, taakkulu sakkortuumik pinerlussimasut ilagaat.
Inissiisarfik ulikkaarmat inissinneqarsimasut arlallit tigummigallarneqartut peqatigalugit inissinneqartartut, Europami Siunnersuisoqatigiit Naalliutsitsisarneq pillugu Ataatsimiititaliaata nalunaarutigisimavaa. Tamanna ajornartorsiutaasinnaavoq, inissinneqarsimasummi tunngaviusunik pisinnaatitaaffiiagaasarmata.
Danskit naalakkersuisui tatineqartut
Aaja Chemnitzip Kalaallit Nunaanni eqqartuussiveqarnerup iluani inissat naammattumik pigineqannginnerat pillugu inatsisinik atortitsinermut ministeri Peter Hummelgaard arlaleriarluni ataatsimeeqatigisarlugu nassuiaavoq.
- amanna pissutigalugu danskit naalakkersuisui aningaasanik amerlanerusunik atuisariaqarput, Aaja Chemnitz oqarpoq.
Nuummi inissinneqarsimasunut atugassarititaasut pitsaasuusut, Europap Siunnersuisoqatigiivisa Naalliutsitsineq pillugu Ataatsimiititaliaata nalunaarusiaani allassimavoq. Illorsuup sananeqarnera nersualaarneqarpoq, inissinneqarsimasunullu suliniuteqarneq naammaginartuuvoq.
Inissaqassuserli pillugu ajornartorsiutit aaqqinniarlugit allatut iliuuseqartarnerit annertusarneqarnissaannik qulakkeerinninnissamut danskit naalakkersuisuinut ersarissumik inassutigineqarpoq.
Kalaallit Nunaanni eqqartuussiveqarneq Danmarkimit aqunneqarpoq, tassungalu tunngatillugu unammillernartut inatsisinik atortitsinermut ministerip Peter Hummelgaardip ilisimavai.
Danmarkimi Kalaallit Nunaannilu parnaarussiviit pineqaatissinneqarsimasunullu inissiisarfiit inissaqassusaat amigartoq, taanna oqaluttuarpoq.
Ajornartorsiut aaqqinniarneqarumaartoq, Peter Hummelgaard nalunaarpoq.
- Taamaattumik Kalaallit Nunaanni Pineqaatissinneqarsimasunut Inissiisarfiit maannakkut siunissamilu inissaqassusaat pillugu unammilligassat aaqqinniarlugit pillaateqarneq pillugu aaqqissuusseqqinnermut atatillugu - Danmarkimi pinerluttunik isumaginnittoqarfiup ataani inissaqassutsip saniatigut - aamma Kalaallit Nunaanni pineqaatissinneqarsimasunut inissiisarfiit inissaqassusaat isiginiassavarput, Peter Hummelgaard oqarpoq.
Naalakkersuisut akuliutsinneqarumaartut eqqaaneqarpoq.
/ritzau/
