Naalakkersuisoq corona pillugu takornariartaatinut piumasaqaatit pillugit: Inuit illersorneqassapput
Umiarsuaq takornariartaat Reykjavikkip umiarsualivianiissimavoq. Taanna nunatsinnut ullut tallimat qaangiuttut tikippoq – ilaasullu niunissaminnut qilanaarput.
Taamaaliorsinnaanngillalli.
Umiarsuarnummi takornariartaatinut malittarisassat nutaat naapertorlugit umiarsuaq sapaatini akunnerni marlunni kingullerni nunami allamiissimaguni nunatsinnut taleqqusaanngilaq.
Visit Greenlandip piumasaqaatit nunatsinni umiarsuarnik takornariaqarnermut unitsitsisut sapaatip-akunnerata siuliani nalilerpaa.
AAMMA ATUARUK Piumasaqaatit nutaat takornariartaassuarnik takornariaqarnermut ajalusoortitseratartut
Tamannali iliuuseqarfigineqarsinnaanngitsoq, peqqissutsimut naalakkersuisoq, Anna Wangenheim (D) isumaqarpoq.
Ullunimmi 14-inik malittarisassaqarneq inuit coronamik tunillatsinnginnissaannut illersuutissatuaasoq, taanna KNR-imut mailikkut akissuteqarluni allappoq.
Takornariartaatinut nunatsinnukartunut malittarisassat
Umiarsuit takornariartaatit ullut 14-it kingulliit nunami allamiissimagunik kalaallit umiarsualivianut taleqqusaanngillat.
Malittarisassaq juulip ulluisa 21-anni atuutilerpoq.
Naalakkersuisup Visit Greenlandip ernumassuteqarnera paasisinnaalluarpaa, akissuteqarnerminili allappoq:
- Naalakkersuisut innuttaasut tunillatsinnginnissaannut siullertut sapinngisartik tamaat illersuiniarnissamik anguniagaqarput.
Malittarisassat naligiissikkuminaatsut
Visit Greenlandip pisortaata, Julia Parsip oqarnera naapertorlugu takornarianut timmisartukkut ilaasunut piumasaqaatit assingannik piumasaqaateqartoqarsinnaagaluarpoq. Assersuutigalugu umiarsuarmut takornariartaammut ilaasut taamaallaat nunanit akuerisaasuneernissaat umiarsuillu illoqarfinnut umiarsualivinnullu aalajangersimasunut kisimi talissinnaanissaat.
AAMMA ATUARUK Angalatitseqatigiiffiit: Staycation ima misigaarput
Anna Wangenheimilli tamanna takorlooruminaatsippaa.
- Umiarsuakkut angallanneq timmisartuussinermut angallannermut naleqqiunneqassaguni tamanna umiarsuarmi ilaasut nunatsinnut aallannginnerminni tikinnerminnilu tunillatsissimannginnerminnik uppernarsaateqassapput. Misissuineq taama ittoq suliarissallugu pisariungaatsiassaaq, naalakkersuisoq allappoq.
Ullunik 14-inik malittarisassaqarneq
Nunatsinnut angalanermut atatillugu piumasaqaatit nutaat juulip ulluisa 21-anni atuutilerput. Anna Wangenheimip COVID-19-imik tunillatsinnermit nappaatip ersiuteqartitsilertarneranut ullut 14-it ingerlasartut, umiarsuarnut takornariartaatinut piumasaqaatit pillugu nassuiaatigaa.
- Umiarsuarmi tuniluuttoqannginnera nalunaarutigineqassappat umiarsuarmi nappaammik tunillatsittoqarsimanani ullut 14-it ingerlaqqaassapput, Anna Wangenheim mailikkut allappoq.
Nunatsinnut angalanermut piumasaqaatit pillugit nalunaarummi umiarsuarnut ilaasartaatinut takornariartaatinullu nunatsinnukarusuttunut Island Savalimmiulluunniit ullunik 14-inik malittarisassaqarnermut ilanngunneqanngitsumiinngitsut Naalakkersuisut erseqqissaatigaat
Anna Wangenheimip oqarnera naapertorlugu umiarsuarnut takornariartaatinut ilaasartut allanngoraannavittarput, taamaammat malittarisassat Islandimut Savalimmiunullu aamma atuunnera isumassartaqarluarpoq.
- Umiarsuarni nunatsinnut tikittartuni ilaasut savalimmiormiuunatillu islandimiuuneq ajorput, naalakkersuisoq akissuteqaammini allappoq.
