Naalakkersuisoq ATV'inut akitsuutikinnerulersitsiniartoq
Inuussutissarsiutigalugu qamuteralannik ATV-nillu atuisut inuussutissarsiornikkut ineriartortitsinissaannut aqqutissiuunniarneqarput.
Qamuteralaat sisamanillu assakaasullit ATV-nik taaneqartartut akitsuuteqanngitsumik eqqunneqartalerpata Aningaasaqarnermut Naalakkersuisup inuiaqatigiinnut iluaqutaassangatippaa.
- Sumi inissisimanerit malittaralugit nunaqarfiit isorliunerusut taavalu suliffeqarfiit ATV-nik atuisartunut iluaqutaanerussaaq ATV-nut snescooterinullu akitsuutit peernerinut, aningaasaqarnermut akileraartarnermullu naalakkersuisoq, Pele Broberg oqarpoq.
Kujataani savaatillit sulinerminni ATV-t atortarpaat, taakkulu aningaasaqarnikkut oqilisaanniarneqarput.
AAMMA ATUARUK Naalakkersuisoq vil fjerne afgiftsfritagelse
- Ullumikkullu tusaamallutigu savaatillit ukiup ilaannakortuani ATV-tik atortaraat akitsuutaa akilersinnaannginnamikku imaluunniit akisugalugu. Taamaammat tamakku ineriartortinnissaat periarfissinniarlugit soorunami qiviarnikuuarput qanoq isilluta ikiorsinnaanerlugit.
Qamuteralaat ataatsit eqqunnerinut akitsuut maanna 22.000 koruuniuvoq, taannali peerneqarpat aamma ATV-nut akitsuut peerneqarpata sulinermut aamma takornariaqarnermut sunniuteqarluarnissaa, Naalakkersuisup neriuutigaa.
- Nunaqarfiit iluanni ATV-nut akissaqanngikkuni imaluunniit snescooterinut akissaqanngikkunik takornarissat assartorsinnaanngilaat, imaluunniit eqqagassat ilaatigut assartorneqartarput ATV-t atorlugit taavalu soorunami tunisassiassat.
Piffissami 2014-miit 2017-imut qamuteralannik ATV-nillu eqqussinermi akitsuutit ukiumut agguaqatigiissillugu 6,4 million koruuninik Nunatta Karsianut isertitsissutaasarput.
Siunnersuut akuerineqassappat ukioq 2019 aallarnerfigalugu atuutilissaaq.
AAMMA ATUARUK Nye bilafgifter skader miljøet