Naalakkersuisooqatigiit quunik misissuisarnissamik piumasaqaataat nalunartoqartoq
Politikerinut piumasaqaatit siunissami sakkortunerulissapput. Naalakkersuisooqatigiinnissamut isumaqatigiissummi tamanna anguniakkanut ilaavoq.
Aamma atuaruk Qinigassanngortittut quumik misissortinnissaa ajoriffissaqartinngilaat
Siumut, Demokraatit Atassutillu Naalakkersuisooqatigiinnissamut isumaqatigiissutaanni atuarneqarsinnaavoq Inatsisartunut ilaasortanngortut tamarmik quui misissorneqartassasut, inerteqqutaasumik atuisimannginnerat uppernarsarniarlugu:
Partiit tamarmik isumaqatigiissutigisaattut qinigaasinnaanermut nalinginnaasumik piumasaqaatit nalilersuinerillu saniatigut, Inatsisartunut Naalakkersuisunullu qinikkat tamarmik ikiaroorniutinik inerteqqutaasunik atuisimannginnerat uppernarsarniarlugu misissuisoqartassaaq" Naalakkersuisooqatigiinnermut isumaqatigiissummi qupperneq 3-mi allaqqavoq.
Naalakkersuisullu nutaat tassunga tunngatillugu inatsisissatut siunnersuusiorunik, isumassarsiamut Narsami qineqqusaartoqarnerani qinersisartut ilaannit saqqummiunneqartumut, inatsisartuni amerlanerussuteqareerput.
D piumasaqaammik kissaateqanngilaq
Piviusunngortinneqarpalli immaqa piumasaqaatit taama sakkortutiginavianngillat. Tassami Demokraatit Siumukkut Atassutikkullu Naalakkersuisooqatigiinnissamut atsioqatigigaluarlugit quunik misissuisarnissaq piviusunngussanersoq nalunarpoq.
- Quilluni misissortinneq isumassarsiatsialaavoq, tamannali nammineq piumassuseq aallaavigalugu pisinnaasariaqarpoq, Inatsisartunut ilaasortaq Demokraatillu siulittaasuat, Andreas Uldum KNR-imut oqarpoq.