Naalakkersuisooqatigiilersut: Akileraarut nikissanngilaq
Nuna tamakkerlugu akileraarut qinigaaffimmi uani nikisinneqassanngilaq.
Taava aamma akileraarutitigut kommunit isertitai nalimmassarneqassapput, taamaalillutik nunatta assigiinnerusumik ineriartortinnissaa qulakkeerumallugu.
Siumut, Demokraatit Atassullu naalakkersuisunngorniarlutik isumaqatigiissutaanni taama allassimavoq.
Sermersooq akiliinerulissasoq
Naalakkersuisut Nunatta assigiinnerusumik ineriartortinnissaanik sulissutiginninniarmata, Kommuneqarfik Sermersuup kommuninut allanut tunniuttagaasa maannakkornit amerlanerunissaat suli aalajangiusimaneqarpasippoq. Tassami Kommuneqarfik Sermersuumi innuttaasut agguaqatigiisillugu akileraarutissaasunik isertitaqarnerpaapput.
Sanaartorneq pisariaqartitsineq naapertorlugu
Pisortat sanaartornermut aningaasaliissutaat nunap immikkoortuinut pisariaqartitsineq naapertorlugu siammarterneqarnissaannik siunniussaq Naalakkersuisooqatigiilersut nutaat siuliminnit kingornuppaat. Tamannali misissueqqissaarnerup nalilersuinerullu kingorna pissasoq isumaqatigiissutaanni allaqqavoq.
Suliffeqarfiit iluaquserneqassasut
Nunatta avataaniit aningaasaliisinnaaneq pilerinarsarniarlugu suliffeqarfiit akileraarutaat nunanut avannarlernut unammillersinnaasunngorlugu inissinneqassasoq.
Danmarkimut ikioqquniartut
Nunatta aningaasaqarnera ilungersunartorsiornera Naalakkersuisoqatigiilersut isumaqatigiissutiminni tikkuarpaat, taamaammallu Naalakkersuisooqatigiit Danmarkimiit aningaasanik ikiorserneqarnissaq siunertaralugu saaffiginnissuteqarniarput.
Tassani Nunatsinni inerisaanissamut sanaartugassanullu annertuunut atugassanik aningaasateqarfimmik qallunaat nunaat pilersitseqatiginissaa siunertarineqarpoq. Allatut oqaatigalugu: Naalakkersuisooqatigiinngortut Danmarkimut aningaasanik qinuniarput Nunatsinni inerisaaneq piviusunngortinniarlugu.
Tamannalu pissanganassaaq Danmarkimit qanoq qisuariarfigineqassanersoq, tassami Qallunaat nunaanni statsministerip Helle Thoning-Schmidtip oqaatigereerpaa, Danmarkip naalagaaffia sanaartorneq eqqarsaatigalugu Nunatsinnut aningaasaliinavianngitsoq