Naalakkersuisooqatigiilersut aalisarneq aaqqissuuteqqissavaat
![](/sites/default/files/styles/image_934x467/public/article_images/makrel_5.jpg?itok=24QvGB6Z)
Aalisarnerup iluani nutarterineq aningaasartuutaangaatsiassaaq. Naalakkersuisooqatigiilersullu isumaqatigiissutaanni ersinngilaq aalisarnermik suliaqartut nutarterinermi qanoq pilliuteqassanersut.
Imartatta aalisagaqassusia paasiniarluarniarlugu Pinngortitaleriffimmut aningaasaliissutit amerlineqassasut, Naalakkersuisooqatigiinnissamut isumaqatigiissummi allaqqavoq.
Aalisagaqassutsip misissorneqarnissaanut aningaasanut inatsisit aqqutigalugu Naalakkersuisooqatigiit Pinngortitaleriffimmut aningaasaliiniarput. Aningaasaliinermi piumasaqaataavoq Pinngortitaleriffik aalisarnermillu inuussutissarsiuteqartut aalisagaqassutsimik misissuinermi suleqatigiinnissaat.
Aalisakkat nalituunngorsarneqarlutillu sapinngisamik Nunatsinni tunisassiarineqartalissapput, tamannalu Nunatsinnut tulaassinissamik pisussaaffiliinikkut Nunatsinnullu tulaassinngitsunut akitsuusersuinikkut pissasoq, Naalakkersuisooqatigiinnissamut isumaqatigiissummi allassimavoq.
Aalisartut aalisariutiminnik nutarterinissaannut periarfissaat aamma ajornannginnerulersinneqassapput. Tassani siunertarineqarpoq aalisariutit nutaanngitsut nutaanik taarsersorneranni aalisartut aalisarnissamut akuersissutitik annaasassanngikkaat. Tamakku tamaasa eqqarsaatigalugit aalisarnermut inatsisit paasiuminarsarneqassapput.
Aalisarneq pillugu aqqissuusseqqinnissamut atatillugu, sinerissap qanittuani aalisartut amerlisarniarneqarnissaat sukumiisumik allaaserineqarsimanngilaq aamma allaaserineqarsimanani, aalisariutinik nutarterinermi Oqartussat aningaasaleeqataassanersut eqqaaneqarsimanani.