Naalagaaffiit Peqatigiit Afghanistanimit qimaasunut millionit affaannut piareersartut
Islamisiortut Afghanistanimi pissaanermik tigusinerisa kingorna Afghanistanimit qimaasut millionit affaat pallissinnaagaat, Naalagaaffiit Peqatigiit ernummatigaat. Naalagaaffiit Peqatigiit qimaasunut qullersaqarfiata UNHCR-ip tamanna sillimaffigaa piareersaleruttorlunilu.
UNHCR-ip qullersaata tullia Kelly Clements tusagassiortunut tallimanngornermi sassarnermi taama oqarpoq.
Nunat Afghanistanip saniliisa killeqarfitik qimaasunut ammatissagaat taassuma kaammattuutigaa.
- Afghanistanimiorpassuit qimaasut suli takunngilarput, Afghanistanimili pissutsit ilimagisamit sukkasnerusumik ineriartorput , Clements, nutaarsiassaqartitsivik Reuters naapertorlugu oqarpoq.
- Nunarsuup immikkoortuani tassani qimaasut 500.000-t missaanniissinnaanissaat piareersimaffigaarput. Tassa ajornerpaamik pisoqassappat, taanna oqarpoq.
Assersuutigalugu Iranimut Pakistanimullu qimaasut amerlasuut suli siumorneqarsimanngitsut taassuma ilanngullugu oqaatigaa.
Afghanistanimiut 5,2 millionit missaat Afghanistanip saniliini maanna najugaqareerput. UNHCR taama ilisimatitsisoq, nutaarsiassaqartitsiviup DPA-p allaaseraa.