Naalagaaffiit Peqatigiinni oqallinneq: Inuusuttut silap allanngoriartornera ernummatigaat

- Aap, Kalaallit Nunaanni nunarsuarmilu tamarmi inuit silap allanngoriartorneranik misigisaqartut akornanni sila pillugu ersisoqaqaaq.

Taama Maya-Natuk Rohmann Fleischer, Naalagaaffiit Peqatigiit meeqqat pillugit isumaqatigiissutaat pillugu New Yorkimi oqallinnermi UNICEF-imi meeqqat siunnersuisoqatigiivini aggustimi peqataasoq oqarpoq.

2021-mi aalajangiunneqarpoq meeqqat pillugit nutaamik isumaqatigiissusiornermi meeqqat nunarsuaq tamakkerlugu ukiut tamaasa oqallinnernut peqataasassasut.

Tassanilu Maya-Natuk Rohmann Fleischer nunatsinniit peqataavoq.

Oqallinnermi pineqartut, tassalu meeqqat peqataatinneqarnissaat siunertaagaluartoq, meeqqat oqalliseqataasut peqataatinneqarnerunissartik oqaluuserisimavaat.

- Meeqqat isumaat, qanorlu meeqqat tusarneqarnissaat oqaluuserisorujussuuarput, Maya-Natuk Rohmann Fleischer oqarpoq.

Iliuuseqartoqartariaqarpoq

Naalagaaffiit Peqatigiit meeqqat pillugit isumaqatigiissutaanni eqqiluisaarneq, peqqinneq piujuartitsinerlu meeqqat siunnersuisoqatigiivinit ukkatarineqarput. Sammisat taakku saniatigut silap allanngoriartornera immikkut aamma sammineqarsimavoq.

Taama UNICEF tusagassiorfinnut nalunaarummi allappoq.

Sammisaq Maya-Natuk Rohmann Fleischerimut pingaaruteqartoq.

- Sammisaq pingaarutilerujussuuvoq paarilluartariaqarlutigullu, uagutsinnummi tunngasorujussuuvoq, oqarpoq.

Meeqqallu siunissartik pillugu ernumanerulissanngippata inersimasut massakkut iliuuseqartariaqartut, Maya-Natuk Rohmann Fleischer isumaqarpoq.

- Meeqqat sila pillugu ersissuteqarnerat pitsaanerpaamik iliuuseqarfigissagaanni iliuuseqarusussuseqartoqartariaqarpoq. Imaappoq kikkut tamarmik allanngueqataanissamut iliuuseqaqataanertik takutissavaat tamanna siumut ingerlariarnissamut pitsaanerpaammat.

- Inuusuttut nalunngilaat silap allanngoriartornera iliuuseqarfigineqartariaqartoq tamannalu massakkut pissaaq