Naajat akissarsissutaasalerlik
Naajaq ataaseq 25 kroner.
Tassa naajat amerlatsaaliornissaannut Qaasuitsup Kommuniani kommunalbestyrelsemi ilaasortap Kristian Jeremiassenip siunnersuutaa. Taamaasilluni Ilulissani umiarsualiviani naajarpassuit ajornartorsiutaanerat pillugu oqallinnermut Kristian Jeremiassen ilannguppoq.
Naajaat kaattut aalisakkanik suliffissuarmut isertalersimapput nerisassarsiorlutik. Sulisut ilaat kiinnamigut naajamit kiitissimavoq naajaq suliffissuarmut isertoq ungoorniartillugu.
Naajat ikilisarnissaannut periarfissaasinnaavoq naajat pisat akissarsissutaasalerpata, Kristian Jeremiassen isumaqarpoq.
- Naajaq kusassaataanngilaq aamma isumanga malillugu tassaavoq pilianut tulukkatuulli serlersaarisartoq taamaattumik siunnersuutigivara akit allattorsimaffiani ilaatinneqalissasoq naajaq taamaalilluni amerlatsaaliuinermi ilanngunneqassalluni, Kristian Jeremiassen oqarpoq.
Kommune allattorsimaffiuteqarpoq uumasunut amerlitsaaliukkanut. Uumasut tassani allassimasut ilagaat tulukkat, qimmit, eqalussuit uumasullu allat.
- Allattorsimaffimmut naajap isigai tunniunnerini 25 koruuninik pissarsissutaasalersillugit ilanngunneqarsinnaapput, Kristian Jeremiassen oqarpoq.
Royal Greenland aamma Halibut Greenland qaleralinnik tunisassiortuusut naajat ajornartorsiutaanerannik nalunaareerput. Qaasuitsup Kommuniata aamma tusarusuppaa qanoq ililluni ajornartorsiut qaangerneqarsinnaanersoq.
