Naaja: Uanga illillu eqqugaassaagut
Nuna tamakkerlugu pilersaarusiamut nassuiaat unammilligassanik, arlaannik iliuuseqartoqanngippat nunatsinni atugarissaarnerup maannakkutut isikkoqarneranik allanngortitsisinnaasunik, ersersitsivoq.
Aamma atuaruk VIDEO Uldumip naqissuserpaa: Nunatta karsiata amigartooruteqarnera tamanut sunniuteqassaaq
- Ernereernermi sulinngiffeqarnermi ullormusiat. Isumaginninnermi ikiorsiissutit allallu matuma kingornani anikilleratarsinnaapput. Utoqqalinersiutit ikilisariaqalersinnaapput, meeqqat atuarfiinilu atuartut amerlanerusariaqalersinnaallutik. Uanga, illit allallumi tamatta eqqungaassaagut. Tassalu nunatsinni atugarissaarneq taama sunnerneqaratarsinnaavoq. Ajornermik pisoqartinnagu iliuuseqarnissaq pisariaqarpoq, Naaja Nathanielsen oqarpoq.
Naalakkersuisut nersualaarpakka
Taassuma nuna tamakkerlugu pilersaarusiamut nassuiaatip saqqummerneranit paasissutissat nuannaarutigai. Naak paasissutissat taamaattut siornatigut akileraartarnermut atugarissaarnermullu isumalioqatigiissitap paasissutissiissutigisareeraluarai.
- Naalakkersuisut nuna tamakkerlugu pilersaarusiamut nassuiaat suliarisimammassuk nuannaarutigaara. Ukiut tamaasa suliarineqartartussaagaluartoq ukiuni 20-ni suliarineqarsimanngitsoq saqqummiunneqarnerani Naalakkersuisut nersualaaginnarsinnaavakka. Tamanna ajunngilluinnarpoq, Naaja Nathanielsen oqarpoq.
Aamma atuaruk Iluarsartuusseqqinnerit kalaallit tamarluinnarmik malugiumaarpaat
Sakkussatsialak
Politikkerinit unammilligassat ilisimaarineqareeraluartut isumaqanngilaq aaqqiissutissanik aaliangiisoqareersimasoq. Aaqqissuusseqqinnerit suli aalajangiiffigineqanngillat.
Aningaasaqarnermut naalakkersuisoq Anda uldum erseqqissaavoq nuna tamakkerlugu pilersaarusiamut nassuiaatip saqqummiunneqarneratigut utoqqatsissutaasinnaasunik ujartuisoqarunnaarluni suliniutit aallartisarneqassasut.
- Una isingineqassanngilaq ajornartorsiutaannarnik imaqartoq, taamaanngilaq. Una sakkussatsialattut tiguneqassooq unamilligassagut qanoq ittuuppat taava unammilligassagut takoriarlugit qanoq ittuunersut aaqqiissutinnamik eqqarsarnissamut sakkussatut, Anda Uldum oqarpoq.