Iluarsartuusseqqinnerit kalaallit tamarluinnarmik malugiumaarpaat
Imaluunniit allatut oqaatigalugu, aningaasarsiorneq unittooqqavoq suliffissaaleqinerullu qanittukkut apparnissaa naatsorsuutigissanngilarput.
Naak Aningaasaqarneq pillugu Siunnersuisoqatigiit isumalluarnarpallaanngitsumik oqariartuuteqaraluartut, nunatta siunissaa aamma neriulluargineqarpoq.
Kalaallit Nunaata maannakkorpiaq ajunngitsumut imaluunniit ajornerusumut ingerlalersinnaalluni maanna inissisimasutut nalilerneqarpoq.
-Ajunnginnerusumut ingerlalersinneqarsinnaasoraara, Torben M. Andersen.
Taamatulli pisoqassappat annertuumik iluarsartuusseqittoqartariaqassaaq, taakkulu ima sakkortutigissapput kalaallit tamarmiunnarmik malugisinnaassallugit.
Torben M. Andersenip taamaammat aamma akileraartarnikkut, isumaginninnikkut, soraarnerussutisiatigut, ineqarnikkut pisortallu allaffissornerisigut iluarsartuusseqqittoqarnissaanik politikerit neriorsuuteqarsimanerat iluarisimaarpaa.
-Politikerit pilertortumik iluarsartuusseqqinnissamik tigussaasumik suliaqarnissaat pingaaruteqarluinnarpoq, siunnersuisooqatigiit siulittaasuat oqarpoq.
Iluarsartuusseqqinnerilli naammannavianngillat. Kalaallit Nunaata aningaasaqarnera ingerlallualersinneqassappat aatsitassarsiorluni suliniutit angisuut arlaat sukkanerpaamik aallartinneqarnissaat pisariaqarpoq. Taakkulu marluk iluatsinneqassappata nunatsinni ineroartorneq pitsaasupilussuaq aallartissinnaassaaq.
Iluatsinngitsoorpatali neriunartoqarpallaarunnaassaaq.
-Iluarsartuusseqqinnerit aatsitassanillu suliniutit sukkanerpaamik aallartinneqanngippata ukiut 5-10-it ingerlaneriinnaani ajorluinnartumik inissisimasoqaleratarsinnaavoq, Torben M. Andersen oqarpoq.