Naaja: Qalasersuaq sumut atorneqassanersoq oqallisiginissaa pingaarneruvoq
Immap naqqa kvadratkilometerit 895.000-inik annertutigisoq piumasarineqarpoq, taannalu nunatta annertussusaata affaannik annertutigaaq.
- Isumaqarutta nunarput qalasersuarmut atassuteqarnera uppernarsaateqartoq, piginnittussaanerput suaarutiginissaa inissaminiippoq. Pingaaruteqarpoq, kisiannili nunarsuarmioqatitsinnut sumut atussaneripput oqallisiginissaa pingaaruteqartorujussuuvoq. Taakkua qitiusumik oqallisissutissaapput, Naaja Nathanielsen oqarpoq.
Piumasaqaateqarnermilu aatsitassat pingaarnerunngitsut isumaqarpoq, kisianni qalalersuup sumut atorneqassaneranut oqallisigineqarnissaa pingaaruteqarnerunerarpaa:
- Kalaallit nunaannut tunngatillugu aatsitassarsiornerup iluani ilaatigut ernumagisat ilaatigullu sinnattorisat aallartinneqarnissaat eqqarsaatigalugit ingerlatsisoqanngilaq. Sermersuullu aakkiartornerata ilutigalugu sumiiffiit ilaanni angallanneq annertusiartussaaq. Taamaattumik pingaaruteqartorujussuuvoq sumiiffimmut piginnittussaatitaaneq kisiat qulakkiiginnarnagu aamma inissinneqartariaqarpoq qalasersuaq sumut atussaneripput, Naaja Nathanielsen oqarpoq.
Arlallit piumavaat
Danmarkiinnaanngilaq nunap ilaanik piginnittussaatitaanermik piumasaqartoq. Tassami piginnittussaatitaanermut killiliussat Nunatta, russit canadamiullu killigitikkumasai qaleriipput.
Nunat tamalaat ataatsimiitsitaliarsuata aaliangiukkuniuk nunat taaneqartut tamarmik inatsisitigut piginnittussaanermik tunngavissaqartut taava nunat akornanni isumaqatigiinniarnerup aaliangissavaa killeqarfiit sumiilissanersut.
- Isumaqarpunga pissusissamisoorlunilu pingaaruteqartoq nunap ilaanik piginnittussaatitaanerput suaarutigissallugu, uppernarsarsinnaagutsigut sumiiffik pineqartoq Nunatsinnut atasoq. Taamatulli aamma pingaartigaaq nunap ilaa sumut atorniarnerlugu nunarsuarmioqatitsinnut oqariartuutiginissaa, Naaja Nathanielsen oqarpoq.
Taassuma nunanut allanut isumannaallisaanermullu ataatsimiitsitaliap kiisalu aningaasaqarnermut akileraartarnermullu ataatsimiitsitaliap pilersinneqarnisaa ullumi pisussaq qilanaaraa.
- Ataatsimiitsitaliat qaammatini kingullerni marlunni uninnganikuupput, taamaammallu paasissutissat kingulliit takunikuunngilagut, naatsorsuutigaarali ualeru pissallugit, Naaja Nathanielsen oqarpoq.