Naaja Nathanielsen nunatta aningaasaqarnera pillugu eqqortumik oqaluttoqarnissaanik ujartuisoq

- Aningaasatigut ajornartorsiorneq piviusuuvoq - Kalaallit Nunaani kiffartuussivinni tamani atugassarititaasut ajornerulernissaannut piareersimalereertariaqarpugut. Nukiit tamarmik atorneqassapput, ulluinnarni atugassarititaasut ajornerulernissaat pinngitsoortinniassagutsigu, tamannalu ajornakusuussaaq, Naaja Nathanielsen tusagassiuutinut nalunaaruteqarluni taama allappoq.

Taassuma erseqqissaatigaa, aningaasanut inatsit 2014-imut atuuttoq piviusorsiortuunngitsoq, Inuit Ataqatigiit isumaqarmata.

- Aningaasaqarnermut Naalakkersuisup qulakkeerlugu oqaatigaa, nunatsinni aningaasaqarniarneq annertunerusumik isumakuluutiginagu.

- Tamanna isumakulunnartoqartippara. Nunami oqartussaasut taama nipitutigisumik oqaatiginngitsuuppassuk ajussanngikkaluarpoq, Naaja Nathanielsen oqarpoq.

Isertitassanik suliffissanillu nutaanik pisariaqartitsisoqarpoq. Taamaattoqarnissaannillu ilimanaateqannginnera nassuerutigisariaqarparput, tassami sulianik annertuunik takkuttoqarnissaa ilimananngilaq taakkua siunissami aningaasaqarnitsinnik iluaqutaassussaagaluarput. Pisortat aningaasaliissutigisaat tamarmik imminnut akilersinnaasariaqarput. Taamaattumik Inuit Ataqatigiinnit tikkuarneqarpoq, sanaartugassanut aningaasaliissutigineqartut pingaartumik meeqqat atuarfiinut, inissianut sanaartornermut, avatangiisillu ajunngitsuunissaannut atorneqarneqartariaqarput, Naaja Nathanielsen tusagassiuutinut nalunaaruteqarluni taama allappoq.