Naaja Nathanielsen innuttanik ataatsimiitsitsisarnerit pillugit: Kingullermitut ingerlassapput, maannali uagut peqataalluta
Kujataani Kuannersuarni Greenland Minerals-ip piiaaniarnera pillugu februaarimi innuttaasut ataatsimiitsinneqarput.
Aggustillu 23-anni aamma Kujataani innuttanik ataatsimiititsinerit arfinillit ingerlanneqassapput. Kingullermimmi ataatsimiinnermi politikerinik peqataasoqanngilat – naak tamanna piumasaqaataangaluartoq.
Kuannersuarni suliniut pillugu paasissutissat piviusut:
- Kuannersuit Narsap kilometerinik 7,5-inik ungasitsigisumi avannarpasissortaaniippoq.
- Aatsitassarsiorfik asimi 700 meterinik qutsitsigisumiipppoq.
- Greenland Mineralsip aatsitassarsiorfk ukiuni 37-ni piiaaffiginiarpaa.
- Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
- Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
- Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
- Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut) 111 millionit tonsiussalluni.
Tusarfiit: Greenland Minerals.
Aatsitassat pillugit naalakkersuisoq, Naaja Nathanielsen (IA), naapertorlugu, aatsitassanik piiaaniarneq unitsinniarlugu Inuit Ataqatigiit qineqqusaarnikuugaluartut, innuttanik ataatsimiititsisarnerit unitsinneqarsinnaanngillat.
- Naalakkersuisuni inatsisit malittaraagut, ullumikkullu inatsisini allassimavoq, innuttaasut ataatsimiitsinneqanerini Naalakkersuisoq peqataasassasoq, Naaja Nathanielsen KNR-imut oqarpoq.
AAMMA ATUARUK Kuannersuarnut suliniut pillugu innuttaasunut ataatsimiititsinissat piareertut
Naaja Nathanielsenilli Naalakkersuisullu unitsissinnaasaat tassaavoq Kuannersuarni piiaaniarneq.
Inatsisartut ukiaanerani ataatsimiilerpata uranimik piiaanerup inerteqqutaalernissaa, Naaja Nathanielsenip siunnersuutigissamaarpaa. Tassa Kalaallit Nunaanni uranimik piiaaneq inerteqqutaaleqquaa. Siunnersuulli Inatsisartuni akuerineqaqqaartussaavoq.
- Tamatuma kingorna aatsaat nunatsinni uranimik piiaaniarluni qinnuteqaatit itigartinneqarsinnaalissapput, Naaja Nathanielsen oqarpoq.
Piiaaniarneq allat aallarteqqissinnaavaat
Taassuumami ilimagaa, qanorluunniit pisoqaraluarpat Greenland Minerals piiaanissamut qinnuteqaateqarnissaa – naak aamma naannakkut naalakkersuisuusut piiaaniarneq unitsivissorusukkaluaraat.
Aatsitassanut ikummatissanullu inatsit
§ 87 b. Imm. 3. Tusarniaanermut piffissarititaasoq sivitsorneqassaaq, tassa tamanut ammasumik tusarniaanermi piffissarititaasup iluani tusarniaanermut atatillugu tamanut ammasumik naammaginartumik ataatsimiisitsinissamut periarfissaqarsimanngippat, imaluunniit Naalakkersuisut ataatsimiinnernut pineqartunut peqataasinnaasimanngippata.
Tusarfik: Aatsitassanut ikummatissanullu inatsit.
- Aatsitassarsiornissaminnut akuersissummik peqarput, piiagassallu uranimik akoqarnera pissutigalugu, taanna immikkut piumasaaqaatitaqarluni. Taakkuami piiaanissaminnut inaarutaasumik qinnuteqarnissartik piareersassavaat.
- Taamaalillutimmi taakkua inatsisinik naapertuipput, uagullu aamma Naalakkersuisut tungaanniit inatsisinik naapertuerusuppugut.
Aatsitassanilli piiaanermi piiakkap uranitaqanngilluinnarnissaanik piumasaqaateqarlunni siunnersuut akuerineqarpat, Greenland Minerals-ip qinnuteqaataa itigartinneqarsinnaalissaaq.
Tamatumatigulli suliariniagaq unitsinneqavissortariaqanngilaq. Nutaanimmi piiaanissamut akuersaartunik naalakkersuisoqalernissaa utaqqimaaginnarsinnaavaat.
AAMMA ATUARUK Aatsitassanut Naalakkersuisoq: Aatsitassarsiornissamut aap uranimut Kuannersuarnullu naagga
- Suliariniagaq ataasiinnaq pinnagu maanna uranimik piiaaneq unitsinneqassasoq naalakkersuisooqatigiinni kissaatigaarput. Uagut paasisagut naapertorlugit, tamatumunnga tunngaviliissummik inatsisiliornissaq maanna isumagissavarput, Naaja Nathanielsen oqarpoq.
- Politikkikkut amerlanerussuteqartut allamik isumallit kingorna tamanna allanngortissinnaavaat. Tassa demokatii naapertorlugu ingerlatsisoqartillugu pissutsit taamaapput, maannakkorpiaq ilorraap tungaanut aallaraluaruttaluunniit, kingorna naalakkersuisooqatigiilersinnaasut tamanna allanngortissinnaajuassavaat.
- Nunami demokratiimik naapertuiffimmi, qaqugorsuarmut atuuttussamik inatsisiliorneq inerteqqutaavoq.
- Tassa naamik, arlaatigut piiaasoqalinnginnissaa qulakkeersinnaanngilarput, maannali piiakkat uranimik akoqanngivissornissaannik piumasaqaateqarluni inatsisiliornikkut tamanna qanillattorusupparput.
Assiganik aaqqissuussaassaaq
Maannakkuugallartorli aatsitassat pillugit naalakkersuisoq, Naaja Nathanielsen, Kujataani aatsitassarsiorniarneq pillugu innuttanik ataatsimiititsisarluni angalaaqqaassaaq.
Innuttaasunik ataatsimiititsinerit februaarimitulli ingerlanneqarnissaat, inuit naatssorsuutigissavaat. Maannakkulli Aatsitassaqarnermut Naalakkersuisoq, Naaja Nathanielsen, Avatangiisinut naalakkersuisoq, Kalistat Lund (IA) kiisalu Peqqissutsimut Naalakkersuisoq, Kirsten Fencker (Naleraq) peqataassallutik.
- Piiaaniarneq pillugu naatsumik aallarniisoqareeraangat, innuttaasut tunniusimallutik piiaanissamut qanoq isumaqarnertik kiisalu aatsitassarsiorneq avatangiisillu ataatsimut isigalugit qanoq isumaqarnertik saqqummiuttassagaat neriuutigaarput. Tamakkua tusarusoqaagut, Naaja Nathanielsen oqarpoq.
AAMMA ATUARUK Jens-Frederik Nielsen qaartartumik siorasaarineq pillugu: Innuttaasunut ataatsimiititsinermut peqataannginnissaq eqqortuuvoq
Februaarimi kingullermik innuttaasut ataatsimiitinneqarnerini piiaaniarneq pillugu aperisoqarsinnaangaluarpoq, taamanikkulli apeqqutit politikkimut tunngasut akineqarsinnaanikuunatik. Taamanimi Siumut sinnerlugu Naalakkersuisut ataatsimeeqataanngimmata. Taakkua taamani angerlarsimaannarput (savanik)qaartartumeeriniarluni aarlerisaarnerit pissutigalugit.
Maannakkut innuttaasut ataatsimiitinneqarnerini politikki pillugu apeqqutit akinissaannut Naalakkersuisut piareersimassamaarput. Kingullermik innuttaasut ataatsimiitinneqarneranni akineqanngitsut ilagaat – Piiaaniarneq Naalakkersuisut akuersaarpaat?
Taanna akineqassaaq; naamik.
