Angutip savat uranimik nerisaqartut, qaartartunngorlutik innuttaasunut ataatsimiititsinermi issiaviit ataanni qaartut Facebookkikkut videoliami januaarip ulluisa 27-anni takorloormagit ukkatarineqangaatsialerpoq.

Angutip videoliortup kinaassutsiminnik isertuusserusuttup tamanna quiasaarutaannaanerarpaa.

Angutip kinaanera KNR-ip ilisimavaa.

Iluarli ilungersunarnerusumik inissippoq. Naalakkersuisummi nunatta kujataani innuttaasunut februaarip ulluisa tallimaannit ulluni sisamani ataatsimiititsinernut peqaanngillat.

Kalaallit Nunaanni Politiit oqarnerat naapertorlugu angut siorasaaruteqartutut unnerluutigineqarpoq.

Naak angutip videoliamik Facebookikkut siammarterinini ugguaatigigaluarlugu politikerit takkutinnginnerannut pisuutinneqartutut aamma misigisimavoq.

- Uangaalluni misiginalaarami aamma neqitassarsiorfigitiinnarlunga. Tassa ajortussaq utaqqiinnarlugu qamaannarsimasut. Taavalu una quiasaarusiaalluni, politimesterillu aamma oqareerluni sillimaniarnermut qulakkeeqqasoq innuttaasunullu ataatsimiinnernut peqataanngiinnarnissamut pissutissaqanngitsutut nalileereerluni. 

AAMMA ATUARUK Politiit nunatta kujataani innuttaasunik ataatsimiititsinermi isumannaassuseqartoqarnissaa neriorsuutigaat

- Politikerit tikilluaqqusaapput, uloriananngilanga.

Februaarip ulluisa arfineq pingajuanni – tassa nunatta kujataani innuttaasunut ataatsimiititsisoqaleruttortoq Demokraatit naalakkersuisoqatigiinnit tunuariataarput.

Partiip Siumumut umitsaassinera annertungaarmat partiip Siumut naalakkersuisoqatigerusukkunnaarpaa.

Demokraatit oqarnerat naapertorlugu tunuarnerat Siumumit Kuannersuarnut tunngatillugu allamik sammiveqartoqalerneranik ilaatigut pissuteqarpoq, Siumumi siulersuisuunerit nunatta kujataani innuttaasunut ataatsimiititsinissanik tassanngaannartumik kinguartitsinialermata.

Jens-Frederik Nielsenip tunngavilersuutini attakkaa

Jens-Frederik Nielsen Demokraatit siulittaasoraat.

Taanna aatsitassanut maanna aamma naalakkersuisuusimavoq – taassumalu qaartartumeerisoqarnissaanik videoliaq pissutigalugu innuttaasunut ataatsimiititsinernut peqataanissani taamaatippaa.

Taanna aatsitassarsiornermik suliniummi politikkikkut akisussaasuni qaffasinnerpaatut peqataasussaagaluarpoq.

Demokraatit qinersinissamut ullumikkut ulapputileruttorput. Jens-Frederik Nielsenillu nammineq Naalakkersuisullu allat nunatta kujataani innuttaasunut ataatsimiititsinermit peqataannginnerat ugguaatiginngilaa.

- Angutip qaartartumeerinissamik siorasaaruteqarneranut atatillugu imaassinnaavoq tassunga quianartoq, qanorli oqarneq mianersuunneqartariaqarpoq, tamannami kingunerluuteqarsinnaavoq, Jens-Frederik Nielsen KNR-imut oqarpoq.

Taassuma nunatta kujataani inuit qaartartumeerinissamik siorasaaruteqartoqarnera pissutigalugu toqqissisimannginnerat pillugu Naalakkersuisut peqataanngitsut attatiinnarpaa.

Jens-Frederik Nielsenip oqarnera naapertorlugu nammineq politikerillu allat innuttaasunit toqqissisimanngitsunit attaveqarfigineqarput.

- Innuttaasut akornanni toqqissisimanngittoqarneranut pissutaarusunngilanga. Aalajangernerput attatiinnarsimasuugutsigu ilagiinnarinninnermi toqqissimanngitsitsissagaluarpunga. Saaffiginnissutit tigusakka eqqarsaatigalugit taamaaliorsunngilanga. Taamaammat tusarniaanerup ingerlaneranut siullermik peqataanngikkutta pitsaanerusoq aalajangerpugut, Jens-Frederik Nielsen oqarpoq.

Taassumalu Naalakkersuisut iluanni isumaqatigiinngittoqarnera qinikkat peqataanngiinnarnerannut pissutaannginnerpaa. Naalakkersuisuni pisoqarfiunera pissutigalugu aatsitassarsiornissamut suliniutip tusarniaassutigineqarnera sivitsorneqartoq, Demokraatit siulittaasuat oqarpoq.

- Naamik Naalakkersuisuni eqqissiviilliortoqarnera innuttaasunut ataatsimiititsinermi peqataannginnissamut aalajangernitsinnut pissutaanngilaq. Naalakkersuisuni eqqissiviilliortoqarnera tusarniaanerup piffissalerneqarnerata juunip ulluisa aallaqqaanut sivitsorneqarneranik kinguneqarpoq.