Kuannersuarnut suliniut pillugu innuttaasunut ataatsimiititsinissat piareertut
Kuannersuarni aatsitassarsiornissaq pillugu innuttaasunut ataatsimiititsisoqangajalerpoq.
Pilersaarut malillugu ataatsimiititsinerit Narsarsuarmi aggustip ulluisa 23-anni aallarnerneqassapput. Tamatuma kingorna Qassiarsummi, Narsami, Qaqortumi, Igalikumi Nanortalimmi ataatsimiititsisoqassalluni.
Aatsitassarsiornissamik suliniut pillugu ukioq manna siusinnerusukkut ataatsimiititsisoqareernikuugaluarpoq. Taakkuli politikerinit peqataaffigineqanngillat.
Kuannersuarni suliniut pillugu paasissutissat piviusut:
- Kuannersuit Narsap kilometerinik 7,5-inik ungasitsigisumi avannarpasissortaaniippoq.
- Aatsitassarsiorfik asimi 700 meterinik qutsitsigisumiipppoq.
- Greenland Mineralsip aatsitassarsiorfk ukiuni 37-ni piiaaffiginiarpaa.
- Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
- Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
- Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
- Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut) 111 millionit tonsiussalluni.
Tusarfiit: Greenland Minerals.
Politikerimmi Greenland Mineralsip Namminersorlutik Oqartussallu nunatta kujataani innuttaasunut februaarimi ataatsimiititsineranni peqataanngillat.
Taamani aatsitassanut naalakkersuisuusup, Jens-Frederik Nielsenip (D) oqarnera naapertorlugu politikerit peqataanissaminnik taamaatitsinerat politikerinut (savanik) qaartartuneerinissamik siorasaaruteqartoqarnera pissutaavoq.
AAMMA ATUARUK Nunatta kujataani savanik qaartartuuteqanngilagut – annerpaamik dynamitiuteqarpugut!
Politikerillu peqataannginnerat pissutigalugu innuttaasunut maanna ataatsimiititsisoqassaaq. Naalakkersuisullu pingasut maanna peqataassallutik.
Pilersaarut malillugu aatsitassanut naalakkersuisoq Naaja Nathanielsen (IA) avatangiisinut naalakkersuisoq Kalistat Lund (IA) peqqissutsimullu naalakkersuisoq Kirsten Fencker (N) innuttaasunut ataatsimiititsiartussapput. Kommune Kujallermi borgmesteri Stine Egede (IA) aamma peqataassaaq.
Qassiarsummi Igalikumilu silap ajornera pissutigalugu kingullermik innuttaasunut ataatsimiititsisoqanngilaq. Nanortalimmi innuttaasunut ataatsimiititsisoqarnissaa taamani aamma pilersaarutaanikuunngilaq. Maannalu ataatsimiititsoqartussanngorluni.
Nunatta kujataani innuttaasunut ataatsimiititsinissamut maanna pilersaarutit aaku:
Aggustip 23-at: Narsarsuaq – Hotel Narsarsuaq – ataatsimiittarfik nalunaaqutaq 19-mit 21.30.mut.
Aggustip 24-at: Qassiarsuk – Atuarfik nalunaaqutaq 19-mit 21.30-mut.
Aggustip 25-at: Narsaq – Katersortarfik nalunaaqutaq 19-mit 21.30-mut.
Aggustip 26-at: Qaqortoq – Hotel Qaqortoq – ataatsimiittarfik nalunaaqutaq 19-mit 21.30-mut.
Aggustip 27-at: Igaliku – Katersortarfik nalunaaqutaq 19-mit 21.30-mut.
Aggustip 28-at: Nanortalik – Kulturikkut illu nalunaaqutaq 19-mit 21.30-mut.
Aatsitassarsiornissamut suliniut unitsikkusukkaat tusarniaanerilli unitsissinnaanagit
Naaja Nathanielsenip oqarnera naapertorlugu naak naalakkersuisoqatigiit Greenland Mineralsip Kuannersuarni aatsitassarsiornissamik suliniutaanik unitsitsinissaq neriorsuutigereeraluaraat innuttaasunut ataatsimiititsinerit unitsinneqarsinnaanngillat.
Innuttaasunummi ataatsimiititsinerit Naalakkersuisunit naammassineqarnissaat Greenland Mineralsip pisinnaatitaaffigigaa. Taamaammat tusarniaanerit ingerlasut unitsinneqarnissaat inatsisinik unioqqutitsineruvoq, aamma naak Naaja Nathanielsenip oqarnera naapertorlugu IA-p aatsitassarsiornissamik suliniutip unitsinneqarnissaa qineqqusaarutigigaluaraa.
Aatsitassarsiornissamik suliniutip unikaallatsinneqarnissaa pissutigalugu Naaja Nathanielsen taassumalu aatsitassaqarnermut naalakkersuisoqarfia uranimik inerteqquteqarnissamut inatsisissatut siunnersuusiassaliarput. Tusarniaanerit naammassilluinnalerput uranimillu inerteqquteqarnissamut siunnersuut Inatsisartuni ukiaru ataatsimiinnermi akuerineqarnissaa Naalakkaersuisut naatsorsuutigaat.
Naatsumik opqaatigalugu uranimik ujaasinissaq piiaanissarlu inerteqqutaalissapput. Aammattaaq aatsitassanik uraniunngitsumik misissuinermi piiaanermilu uranitalimmik qanoq annikitsigisumik assaasoqarsinnaaneranut killiliisoqarsinnaavoq. Tassa uraniunngitsumik piiaasoqartillugu agguaqatigiissillugu tonsimut 100 gramit uranitaqarsinnaanerat killigitinneqassaaq.
Kuannersuarni saffiugassat 300 ppm-ip missaannik uranitaqarput, 800 ppm-illu missaannik thoriummitaqarlutk, taamaalilluni IA-p killigitinniagaanit tamanna annertunerungaatsiarluni.
Inatsisissatut siunnersuut maannakkutut itsillugu akuerineqassaguni taanna Kuannersuarnut unitsitsinavianngitsoq, Naaja Nathanielsenip erseqqissaatigaa. Tamannali suliniutip siunissaanut uniffiliisinnaalluni.
- Assersuutigalugu Greenland Mineralsimit uranimik atorluaaniartoqaraluarpat inatsit una atorlugu itigartitsisinnaassaagut, naalakkersuisoq oqarpoq.
