Aron Geislerip savamik qaartartuliornissamik siorasaaruteqartoqarnera illaatigiinnarpaa.Assi: KNR

Nunatta kujataani savanik qaartartuuteqanngilagut – annerpaamik dynamitiuteqarpugut!

KNR-ip Qaqortumi naapitaasa tamarmik savamik qaartartuliaq, Naalakkersuisut nunatta kujataani innuttaasunut ataatsimiitsitsinissanut peqataannginnerannut pissutaasoq, quianartutut isiginngilaat.

- Aap ilaannaa atuarpara, piviusorsiunngingaarmat ikerinnakkut unitsippara, sava bombeq, haha.

Qaqortumeersoq, Aron Geisler Naalakkersuisunut qaartartumeerinissamik siorasaarisoqarneranut suliaq KNR-ip ullormi saqqummiussinerani taama oqarpoq. Qaartartumeerinissamik siorasaarineq, Naalakkersuisut nunatta kujataani aatsitassarsiornissamik suliniut pillugu innuttaasunut qaammat una aallartittoq ataatsimiititsinissanut peqataannginnerannik kinguneqarpoq.

Qaartartumeerinissamik siorasaaruteqarneq naatsumik:

 

Naalakkersuisut qaartartumeerinissamik siorasaaruteqarneq tigusimallugu januaarip ulluisa 29-anni nalunaarutigaat. Taamaammat Kuannersuarni aatsitassarsiornissamik suliniut pillugu innuttaasunut ataatsimiititsinermi peqataaniarunnaarput.

 

Politimesterip, Bjørn Tegner Bayip oqarnera naapertorlugu ataatsimiinnermut ilungersunartumik siorasaaruteqartoqanngilaq. Sillimaniarnerlu qulakkeeqqasoq KNR-imut oqaatigaa. Innuttaasunullu ataatsimiinnernut peqataanngiinnarnissamut pissutissaqanngitsutut nalilerpaa.

 

Naalakkersuisut innuttaasuntu peqataaniannginnerat pissutigalugu suliffeqarfik suliniuteqartuusoq, Greenland Minerals oqartussaniillu inuit assigiinngitsut kisimik innuttaasunut ataatsimiititsinermut peqataapput.

 

Jens Frederik Nielsen: Innuttaasut pillugit innuttaasunut ataatsimiititsinermut peqataanngilagut.

 

Naak politimesterip innutaasunik ataatsimiititsinermi sillimaniarneq qulakkeeqqaneraraluaraa Naalakkersuisut peqataannginnissartik aalajangiusimaannarpaat.

 

Aatsitassanut naalakkersuisuusimasup, Jens-Frederik Nielsenip (D) oqarnera naapertorlugu innuttaasut akornanni toqqissisimannginneq pissutaavoq.

 

- Siorasaarineq tunngavigalugu maanna nalilerparput toqqissisimannginnq Naalakkersuisunut politikkikkullu peqataasunut tunngasoq, Jens-Frederik Nielsen qaartartumeerisoqarnissaanik siorasaaruteqartoqarnerata kingunitsianngua oqarpoq.

 

Naalakkerusisut oqarnerat naapertorlugu siorasaarinerit piviusuunngillat.

Angut qaartartumeerinissamik siorasaaruteqartup oqarnera naapertorlugu tamanna quisaarutaannaavoq. Taassuma ikinngutini peqatigalugu savamik uranitortitseriarlutik tassa savabombimik qaartitsissallutik quiasaarutigaat.

AAMMA ATUARUK Savanik qaartartuliornissamik siorasaarisoq: Iliuuserisakka ugguaringaatsiarpakka

Taakku savamik qaartartuliat Narsami innuttaasunut ataatsimiititsisoqarnissaanut issiaviit ataannut ilisiniarlutik Facebookikkut toqqaannartumik immiussami oqaatigaat.

Angut qaartartumeerinissamik siorasaaruteqartoq kinaanerminik isertuusserusuppoq, KNR-illi kinaanera ilisimavaa.

Siorasaarutit ilungersunartutut tiguneqassasut

Angutip oqarnera naapertorlugu savamik qaartartuliornissami inunnut aalajangersimasunut siorasaaruteqatoqanngilaq. Taanna politiinit tigusarineqarpoq siorasaaruteqartutullu pasineqarluni.

Nunatta kujataani inuit videoaliaq pillugu assigiinngitsunik isumaqarput.

Aron Geislerip nunatsinni najukkamini qaartartoqarnissaa upperiuminaatsippaa.

- Nunatsinni qaartartuliornermi immaqa dynamit-it eqqaasanngikaanni allanik sussaqarunanngilaq, illarluni oqarpoq.

AAMMA ATUARUK Jens-Frederik Nielsen qaartartumik siorasaarineq pillugu: Innuttaasunut ataatsimiititsinermut peqataannginnissaq eqqortuuvoq

Monica Dorphip Siumut sinnerlugu kommunalbestyrelsinut ilaasortap savanik qaartartuliaq pillugu suliaq knr.gl-ikkut atuaramiuk aamma quiagisimavaa.

- Quiassuaatiginninneq paasineqarsinnaavoq, kisiat aamma pimoorullugu tiguneqarnissaa aamma pingaaruteqarpoq, uanga taamak isumaqarpunga.

- Allatut ikasarsinnaasarpugut immaqa maani inimi ataatsimooraangatta, taava kisiat ukua inuit attaveqatigiittarfianik taaneqartartut, tassuunakkut ikasarluni navianartorujussuartut immaqa tiguneqarsinnaasarpoq, inuit qisuariariaaserput aamma assigiinneq ajorami.

Naleqqutinngilaq!

Alibak Hardilli quianarsorinngivippaa. Taanna nunatta kujataani Unescop nunarsuarmioqatigiinnut eriagisassanngortiaani siulittaasuuvoq, qaartartunillu siorasaaruteqarluni quiasaaruteqartoqarniarsinnaanera taassuma naleqqutinngivissoraa.

- Quiasaarutigissallugu pissusissamisoorsorinngilara, taavalu qaartartoq qaartartuuvoq. Taamaammat una quiasaarutitut tissinartutut isiginngilara.

Angutip videoliaata peerneqarnikuunera pissutigalugu KNR-imit takusinnaanngilarput.

Isummersuutit