Múte B. Egede naalakkersuisoqatigiinni suleqatigiinneq pillugu ernumanngitsoq

Siumumi tunuliaqutaasut IA-p uranimik saniatigut piiaasoqarnissaanut isumaanik suli isumaqataanngillat, Naalakkersuisulli siulittaasuata, Múte B. Egedep tamanna naalakkersuisoqatigiinni avissaarutaassasorinngilaa.

Allattoq Hanna Vestergaard Hviid, Karline Platou

juulip 31-at 2023 16:16

Nutserisoq Connie Fontain

Siumumi siulittaasumik sapaatiummat toqqaasoqarmat Erik Jensen toqqarneqarpoq, taannalu naalakkersuisoqatigiinni partiip aappaanik ingerlatsiinnarnissamut pisinnaatinneqarpoq.

Siulittaasumik toqqaanerup inernera Naalakkersuisuni kiisalu naalakkersuisoqatigiinni partiit aappaani Inuit Ataqatigiinni siulittaasup nuannaarutigaa.

- Aallarniutigalugu siulittaasunngornerani pilluaqqoqqikkusuppara manna iluatsillugu partiillu ataatsimeersuarnerani aamma siulersuisunngortut. Naatsorsuutigaaralu massakkut naalakkersuisoqatigiinnermi suleqatigiinnerput ingerlateqqissinnaagipput – nuna pillugu inuilu pillugit sulinerput patajaatsumik ineriartornermillu pilersitsisoq, Múte B. Egede KNR-imut oqarpoq.

Aamma atuarukErik Jensen qinigaaqqinnerminik tulluusimaartoq: Naalakkersuisoqatigiittoqaannarnisaa naatsorsuutigaara

Siumumi nutaamik siulittaasumik toqqaasoqassagaluarpat tamanna Inatsisartunut qinersisoqartariaqalerneranik kinguneqaratarsinnaasoq isumaliutigineqarnikuuvoq. Erik Jensenillu naatsorsuuteqarneratulli Múte B. Egedep naalakkersuisoqatigiinni suleqatigiinnerup ingerlaannarnissaa naatsorsuutigaa.

- Naatsorsuutigaara patajaatsumik ingerlatsisinnaanermut siunnerfeqarnerput massakkut suli nukittorsaqqillugu ingerlaqqissasugut, aammalu soorunami Siumut ataatsimeersuaqqammerpoq taamaalillunilu aamma anguniakkanik toqqammavissanik nutaanik aamma pilersitseqqammerluni, taamaammat akunnitsinni oqaloqatigiissutissaqarpugut, naatsorsuutigaarali pisarnitsitut angusassap pitsaanerpaap nunamut inuinullu tunngasut siunertaralugit aaqqiissutissanik nassaaqatigiikkumaartugut, taanna oqarpoq.

Urani avissaangatitsisoq

Siumup aatsitassanik uranimik akoqartunik piiaasoqarsinnaaneranut isumaa ataatsimeersuarnermi aamma oqaluuserineqarpoq.

Uranip piiaanermi ilaasinnaa Siumut akueraa. Siumullu nunatsinni tamarmi aatsitassarsiornermik suliniutit aamma naak uranimik piiaanermik ilaqarsinnaagaluartut taperserniarlugit sapaatip akunnerata naanerani erseqqissarluarpaa.

Tamatumanili IA isumaqataanngilaq. Partiip uranimik piiaanissamut inerteqquteqarluinnarnissaq Inatsisartut 2021-mi februaarimi qinersinermi ajugaanermi kingorna atuutilersippaa.

Uran partiit taakku marluk akornanni unammillernartunngorsinnaasoq politikkikkut oqaaseqartartup, Sten Lundip KNR-imut oqaatigaa.

Múte B. Egedelli tamanna itisuumik tigunngilaa.

- Naatsorsuutigaara partiit tamatta apeqqummut tassani assigiinngissinnaasumik isumaqarnerput uniffiginagu inuiaqatigiit ineriartornissaat, toqqissisimasumillu aqunneqarnissaat aallaavigalugu suleqatigiinnerput nangikkumaaripput.

- Naalakkersuisoqatigiilernikuuvugut immitsinnut nassaaraluta, apeqqutit ataasiakkaat uniffiginagit, Naalakkersuisut siulittaasuat oqarpoq.

IA Siumullu 2022-mi apriilimi naalakkersuisoqatigiileramik naalakkersuisoqatigiinnerminni uranimik saniatigut piiasoqarsinnaannginnissaa isumaqatigiissutigaat.