PITUFFIK MT Højgaardip Pituffimmi kiffartuussiunnaarnini annertuumik annaasaqaatigissavaa
Aviisi Jyllands-Posten ullumi taama allaaserisaqarpoq.
Entreprenøritut suliffeqarfiup danskinit pigineqartup Greenland Contractorsillu 2/3-anik piginneqataasup - sinnera Namminersorlutik Oqartussanit pigineqarluni - 2014-imut ukiumoortumik nalunaarusiani saqqummiuteqqammerpaa.
AAMMA ATUARUK GC: Pituffik pillugu suliamut mianersoqquneqarsimanngilagut
Naatsorsuutini nutaani Pituffimmit isertitat toqqaannartumik allassimanngillat, ukiulli siuliani - tassalu 2013-imi - MT Højgaard Pituffimmi ingerlatsitsinini 130 millionit koruunit pallillugit iluanaaruteqarfigaa. Naatsorsuutinilu nutaani Pituffimmi ingerlatsineq naammaginartumik angusaqarfiusutut, suliat amerleriarsimasutut ernianillu isertitat amerliarsimasutut nassuiaateqarfigineqarput - tassalu 2013-imisuulli annertutigisumik iluanaaruteqarfiusimalluni.
MT Højgaardip ukiumut angusaata tamarmiusup 207 millionit koruuniusup affaata sinnerpaa.
MT Højgaardilli pisortaanera Torben Billmann isumaqanngilaq Pituffimmi kiffartuussinissamik isumaqatigiissutip annaaneqarneratigut isertitassat imaaliallaannaq annaaneqassasut:
- Isumaqatigiissut annaagaluarlutigu suliassanik nutaanik pissarsereerpugut, taakkulu naatsorsuutini siunissamut naatsorsuutigisatsinnut naapertuupput, Jyllands-Postenimut taama oqarpoq.
AAMMA ATUARUK Namminersorlutik Oqartussat Pituffik pillugu suliamut mianersoqquneqarsimapput
MT Højgaardip Greenland Contractorsimik piginneqataassutini tunissanerai suli nalunarpoq. Ingerlatseqatigiiffiilli marluusut suleqatigiinnerisa Pituffiinnarmik tunngaveqarnera MT Højgaardip pisortaanerata naqissuserpaa:
- Pituffimmi sakkutooqarfimmi sulinitsinnik tamatumalu suleqatigiissutigineranik tunngaveqarpoq, ingerlatseqatigiiffimmilu tassani suliassatigut tamanna kisiat pissarsiaqaatigisarparput.