GC: Pituffik pillugu suliamut mianersoqquneqarsimanngilagut
Suliffeqarfimmimi amerikamiut mianersoqqussutaat ilisimaneqanngilluinnartoq, pisortap Peter Kofoedip oqaatigaa.
- Greenland Contractorsimik piginnittuunerup ajornartorsiutaasorujussuartut matumani inissinneqarnerani suliffeqarfittut uatsinnut maluginiaqquneqarsimanngimmat, tupigusuutigilaanngitsuunngilara.
Greenland Contractorsimi pisortaq, Peter Kofoed, USA-p Nunanut Allanut tunngasunut ministeeriaqarfimmut aamma Namminersorlutik Oqartussat nunanut allanut pisortaqarfiannut mailikkut nassiussaa pillugu taama oqarpoq. Mailikkut nassiussaq Pituffimmi kiffartuussinissamut suliariumannittussarsiuussinerup matunissaanut qaammatit qulinngortullu nassiunneqarpoq.
Aamma atuaruk Namminersorlutik Oqartussat Pituffik pillugu suliamut mianersoqquneqarsimapput
Qarasaasiakkut allakkani nassiussami Greenland Contractorsip neqerooruteqartunut peqataanissaata ajornartorsiutitaqarsinaanera, USA-mit sillimaffigeqquneqarpoq.
Taamaaliorput, Namminersorlutik Oqartussat Greenland Contractorsimik piginneqataammat, aammalu piginneqatigiiffinnut suliariumannittussarsiortussanut USA-p piumasaqaasiornerani ikiuunniarlutik.
Ilimasaarneqarsimanngilaq
Kisianni soqutigisanik taamannak aporaattoqarneranik amerikamiut ajornartorsiuteqarsinnaanerannik, Greenland Contractors Namminersorlutik Oqartussanit, danskit nunanut allanut tunngasunut ministereqarfiannit amerikamiluunniit oqartussanit ilimasaarneqarsimanngilaq.
- Naamik kalerrisaarneqanngilagut. Taamaattoqarsinnaanera uagut nammineq maluginiareerparput. Kisianni kimilluunniit erseqqissaaavigineqanngilagut ilisimatinneqarnataluunniit allanit ajornartorsiutitut isigineqarsinnaammat, Peter Kofoed oqarpoq.
Aamma atuaruk Qujaukitsoq: Hammondip Pituffik pillugu suliami qanoq akuutigisimanera misissorneqassaaq
Namminneerlutik oqaluuserisimavaat
Taanna naapertorlugu Greenland Contractorsimi siulersuisut namminneerlutik oqaluuserisimavaat, suliariumannittussarsiornermut atatillugu Namminersorlutik Oqartussat piumasariniagaannut, suliffeqarfitsik sunniiniarnaveersaassasoq. Tassa siulersuisuni tassani, Namminersorlutik Oqartussat nammineq ilaasortaatitaqarfianni.
- Mianersunngikkutta soqutigisatta aporaatilernissaannik isornartorsiorneqarsinnaanerput, taamani eqqumaffigereerparput, taamaammat taamatut inissittoornissarput mianersuutissallugu piginneqatigiiffimmi taamani oqaluuserereerparput.
Amerikamiut nassuiaassioqqusipput
Amerikamiut qarasaasiakkut allagaanni siunnersuutigineqarpoq, pigineqatigiiffik nassuiaasiussasoq, Greenland Contractors Namminersorlutillu Oqartussat aporaattunik soqutigisaqarnersut imaluunniit taamaannginnersoq, amerikamiut naliliisinnaaniassammata.
- Kisianni taamaattumik nassuiaasioqquneqanngisaannarpugut, taamaammallu taamaattumik suliaqarata, Peter Kofoed oqarpoq.
Aamma atuaruk Tusagassiuut: USA-p Pituffik pillugu akerleriinnermi Danmark itigartippaa
Taanna paarlattuanik isumaqartuarpoq, Greenland Contractors suliarinnittussarsiuussinerup naggatissaanut unammeqataasoq:
- Ullumik kingusinnerpaamik sulianik naammassinniffissaqarsimavugut, kiffartuussinermi akigitinniagarput maajimi 2014-imi tunniullutigu. Taava kingornatigut - aasami 2014 assigiinngitsunik pisoqareertoq - killiffipput tassaavoq nalunagu, kiffartuussinissamut kikkut isumaqatigiissuteqarnissaannut akitiginiagaq kisimi apeqqutaasoq, Greenland Contractorsip pisortaa oqarpoq.
Allanik iliuuseqarsimassagaluarput
Greenland Contractorsip amerikamiut taamannak ilimasaaruteqarsimasut ilisimaaralugu iliuuseqarsimagaluaruni, kiffartuussinissamut ilumut isumaqatigiissuteqarsimassagaluarnersoq nalunarpoq.
Kisianni USA-mit isumakuluut taamanili tusarsimassagaluarlugu, Peter Kofoedip ullumikkut kissaatiginartikkaluarpaa:
- Kingumut qiviarluni sulinissaq ajornaqaaq, kisianni maanna nalunngisagut taamani ilisimasimagaluarutsigit, soqutigisat aporaattoornissaasa pinaveersimatinnissannut pilersaarusiussanerluta aperisimassagaluarpugut. Tamanna periarfissaasoq allakkani eqqaaneqarsimammat, tassanngaaniit aallartissalluni ajunngissagarluaqaaq.
- Taava aamma soorunami aperisimassagaluarpugut, aporaattunik soqutigisaqarneq peqqutigalugu suliariumannittusarsiornermut piukkunnaataarukkumanata allanik iliuuseqassanersugut, Greenland Contractorsip pisortaa Peter Kofoed oqarpoq.
Naluneqanngitsutut Greenland Contractorsip Pituffimmi kiffartuussisussarsiorneq siorna ukiukkut ajorsarfigaa.
