Motzfeldt: Issittoq pillugu periusissiassatut siunnersuut poorskereerpat saqqummiutissavarput
Poorskereerpat.
Issittoq pillugu periusissiassatut siunnersuutissartik Inatsisartunut qaqugu saqqummiunniarneraat, Naalakkersuisunut apeqqutigigatsigu taama akipput.
- Nunatsinni partiinut poorskereerpat nassiussinnaanngussangavarput, taamaalioreeruttalu partiit tamaasa immikkut oqaloqatigissavagut. Tamatuma kingorna piariikannersimassangatipparput, Nunanut allanut, Inuussutissarsiornermut Niuernermullu Naalakkersuisoqarfik KNR-imut allappoq.
Periusissiassatulli siunnersuutaat tamanut saqqummiunneqassanersoq, naalakkersuisoqarfiup ilisimatitsissutiginngilaa. Nunarput Issittoq pillugu siullerpaamik nammineq periusissiaqalissaaq. Issittumi ineriartornerup qanoq ittuunissaanik nunatta kissaatai, taavalu nunarsuatta sinneraneersut Issittumi soqutigisaannut nunatta qanoq isummerneranik taanna ersertsitsisuussaaq.
Kunngeqarfik Naalagaaffeqatigiinni 2011-miit 2020-mut atuuttumik Issittoq pillugu ataatsimoorussamik periusissiaqarpoq. Taanna atorunnaarmat, Issittoq pillugu Naalagaaffeqatigiinni ataatsimoorussamik periusissialiortoqartinnagu nunatta Issittoq pillugu nammineq periusissialiornissi aalajangiusimavaa.
Nunattalu nammineq periusissiassaata naammassiniarnera sivitsoruttoorpoq. Periusissiassallu taassuma naammassineqarnissaa danskit nunanut allanut ministeriata, Lars Løkke Rasmussenip (M), erinitsaappaa.
Issittoq pillugu ataatsimoorussamik periusissiaqalernissaq Kunngeqarfiup pisariaqartilluinnarmagu Inatsisartut naammassilertortariaqaraat, taanna Folketingimi qanittumi oqalugiarami oqarpoq.
Nunatta Issittoq pillugu periusissiassatut siunnersuuteqarnissaa erinitsaakkini, Løkke januaarimi Nuummiitilluni KNR-imut aamma oqarpoq.
Naalakkersuisut Issittoq pillugu periusissiassatut siunnersuummik saqqummiinissamik sivitsoruttoornerat peqqusiileqinaqisoq, Inatsisartut Nunanut Allanut Sillimaniarnermullu Ataatsimiititaliaata siulittaasua Mariia Simonsen (IA) sapaatit akunnerata siuliani aamma oqarpoq.
Motzfeldt: Ataatsimoorussamik periusissaqalernissaq imaaliallaannagassaanngilaq
Lars Løkke Rasmussenili danskillu naalakkersuisui naammagittarnerusariaqarlutillu suleqatiginnikkusussuseqarnerusariartut, Naalakkersuisut isumaqarput.
Inatsisartuni partiit tamaasa immikkut danskit naalakkersuisuisa Issittoq pillugu Kunngeqarfimmi tamarmi atuuttussamik ataatsimoorussamik periusissialiorusunnerat pillugu oqaloqatigeqqaartariaqaritik, nunanut allanut naalakkersuisoq Vivian Motzfeldt (S) KNR-imut akissummini allappoq. Periusissiarlu alla piareersimaleriarpat tamanna aatsaat pissinnaasoq, taanna aamma allappoq.
- Nunanut allanut, sillimaniarnermut illersornissamullu politikkinut tunngasuni nammineq periusissiassarput naammasseqqaartariaqarparput. Kunngeqarfimmilu tamarmi atuuttussamik Issittoq pillugu ataatsimoorussamik periusissialiornermi suleqataassanerluta nunatsinni partiillu oqaloqatigiissutigeqqaassavarput, Vivian Motzfeldt oqarpoq.
Tamatuma saniatigut danskit naalakkersuisui siornatigornit allaanerusumik suleqatigeeriaaseqarnissartik piareersimaffigisariaqaraat, taanna aamma isumaqarpoq.
Danskimmi naalakkersuisui Issittumeersuunngitsumik qallunaamilli Issittoq pillugu aallartitanngortitsinerat, taassuma isoraa. Nunatsinneersumimmi aallartitanngortitsinissaat kissaatigigitsik, Naalakkersuisut erseqqissaatiginikuugaluarpaat.
- Issittoq pillugu aallartitanngortitsinermitulli periuseqarniarunik ataatsimoorussamik periusissiaqalernissarput soorunami imaaliallaannagassaanavianngilaq, Vivian Motzfeldt Kunngeqarfimmi tamarmi atuuttussamik Issittoq pillugu periusissialiornissamut tunngatillugu oqarpoq.
