Motorcykkilit immaqa utersaaqqilerput
![](/sites/default/files/styles/image_934x467/public/article_images/motorcykel630_0.jpg?itok=8bNP9Qs3)
Erininarserianngitsoq motorcykkilit nunatsinni aqqusinerni takussaaleqqeriaannaapput.
Tamanna inatsisartuni aalajangiiffigineqassasoq Naalakkersuisut siunniuppaat aammalu motorcykkilit eqqunneqarsinnaaleqqinnissaat itigartilersaarnagu.
Motorcykkilit eqquteqqusaannginnerisa atorunnaarsinnissaa Atassummiit siunnersuutaavoq.
Eqqusseqqusiunnaarneq 1980-mi atuutilerpoq arlaleriarluni annertuumik ajutoortoqartareersoq. Maannali Atassut isumaqarpoq piffissanngortoq motorcykkilersinnaaleqqinnissamut. Eqqarsaallu tamanna Naalakkersuisunit ajorineqanngilaq.
Taamaattorli apeqqutit arlallit akineqaqqaartussapput aalajangertoqartinnagu.
- Danmarkimisut motorcykelinik ingerlatsisinnaanermut allagartalersuisoqassanersoq, taamaassappallu ingerlatsinissamut ilinniartitsisunik, suliassamik taamaattumik tiguserusussinnaasunik peqarnersoq paasiniarneqassaaq, Angallannermut Naalakkersuisoq Jens B. Frederiksen siunnersuummut akissummini allappoq.
Inatsisartut aamma motorcykkilit nunatsinni ingerlaaqqilinnginneranni oqaluuserissavaat isumannaallisaanermut atortut piumasaqataassanersut assersuutigalugu qitiiarnaveeqqutinik ikkussisoqartalissanersoq.
Inaarutaasumilli aalajangertussat tassaapput Folketingi, tamannali pissappat Inatsisartut inassuteqartussaapput ukiut 31-it nunatsinni ingerlaanngereerlutik motorcykkilit akuerisaaqqilissanersut.