Mont Blancimi sermerujussuup iigarataannaanissaa aarlerisaarutigineqartoq

Qaqqarsuarmi Mont Blancimi Frankrigip Italiallu killeqarfiisa akornanni inissisimasumi sermerujussuaq 250.000 kubikmeterisut angissusilik iigarataannaavoq.
Sermerujussuaq 250.000 kubikmeterisut angissusilik iigarataannaavoq. Nutaarsiassaqartitisviup dpa-p Italiami nutaarsiassaqartitsivik Ansa taama nalunaaruteqarnerarpaa. Assi © : Scanpix
Allattoq Ritzau
septembarip 26-at 2019 05:15
Nutserisoq Hanne Petersen

Sermerujussuaq Italiap killeqarfiata eqqaani inissisimasoq iigaratarsinnaammat aqquserngit marluk Mont Blancip Italiap killeqarfiata eqqaani inissisimasut angallavigineqarsinnaajunnaarlugit assersorneqarput.

Italiami oqartussaasut - qaqqarsuarmi Mont Blancimi isumannaallisaanermut akisussaasuusut - qaqqarsuup Grandes Jorassesip sivinganertaani kangimut sammisumi sermerujussuup Planpincieuxip iigaratarsinnaanissaa aarlerisaarutigaat.

Sermerujussuaq 250.000 kubikmeterisut angissusilik iigarataannaavoq. Nutaarsiassaqartitisviup dpa-p Italiami nutaarsiassaqartitsivik Ansa taama nalunaaruteqarnerarpaa.

- Qaqqarsuarmi sermerujussuup iigaratarsinnaanera qaqqarsuup avatangiisiisa silap pissusiata allanngoriartornerata kingunerisaanik piffissat ilaanni allanngorujussuartarnerannut ersersitsisuuvoq, taamaattumik sermerujussuup iigaratarsinnaanera aarlerinartorujussuuvoq, Stefano Miserocchi oqarpoq.

Stefano Miserocchi Italiami illoqarfeeqqat ilaanni Courmayeurimi qaqqarsuup Mont Blancip ataani inissisimasumi borgmesteriuvoq.

AAMMA ATUARUK Islandimi sermeq aajuitsoq aattoq siulleq eqqaassuserneqartoq

Italiami ilisimatusartoqatigiit Fondazione Montagna Sicurameersut sermerujussuaq Planpincieux 2013-imili alaatsinaattuarsimavaat.

Qaqqarsuaq Mont Blanc imaluunniit Monte Bianco 4810 meterisut portussuseqartoq uiguleriinnik qaqqaqarfissuarmi Alpernemi qaqqani portunersaavoq. Qaqqarsuaq taanna Frankrigip Italiallu killeqarfiisa akornanni inissisimavoq.

Europami sumiiffinni arlalinni sila arriitsuararsuarmik allanngoriartormat isaannarmik takuneqarsinnaasumik imaaliallaannaq sunniuteqartanngilaq. Mont Blancimulli sunniuteqarsimanera takussutissaqalerpoq. Qaqqarsuarmimi sermerujussuaq ukioq kaajallallugu aajuitsuusartoq ilimagisamit sukanerusumik aakkiartorpoq. Tamannalu ilutigalugu sermerujussuup ataqatigiinneranut “nipinneqqutaasut” aakkiartorput.

Ilisimatusartut sumiiffinnik inunnit arlaqanngitsunit anguneqartartunik ujararujussuarnik nakkaagajuttoqarfiusartunik nassaakkajuttarput. Pisuinnartunulli aqqutissiat ilaannikkut eqqugaakkajunnerusarput, aammali innartorfiusartoq qaqqasiortalerlaanit atuarneqakkajuttartoq siorna eqqugaarujussuarpoq.