Islandimi sermeq aajuitsoq aattoq siulleq eqqaassuserneqartoq
Islandimiut sermeq aajuitsoq, Okjökullimik taaguuteqartoq ”Ok”-tullu aamma ilisimaneqartoq 2014-imi piuneeruttoq eqqaaniarniarlugu sapaatiummat katersuupput.
Ilisimatuut sermit aajuitsut 400-t allat aamma aaratarsinnaanerannik aarlerisaaruteqarneranik taama eqqaassutiliisoqarpoq.
Islandimi sermeq aajuitsoq silap pissusaata allanngorneratigut aattoq siulleq sapaatiummat ualikkut eqqaaniarneqarpoq.
Islandip kippasissortaani qaqqap aajuitsup sumiiffigisimasaani eqqaaniaasoqarpoq.
Eqqaaniaaneq ”Siunissamut allakkamik” qulequtaqartinneqarpoq. Allagaq islandimiusut tuluttullu allagaavoq.
- Ok sermit aajuitsuni siullersaalluni aappoq. Sermit aajuitsut allat ukiut 200-it tulliuttut ingerlaneranni aannissaat naatsorsuutigineqarpoq.
- Eqqaassutissiaq una susoqarneranut qanorlu iliortoqarnissaanut ilisimasatsinnut uppernarsaataavoq. Ilissilu (siunissami innuttaasut, aaqq.) kisissi taamaaliorsimanersugut ilisimassavarsi.
Sermeerunneq
Islandip ministeriunera, Katrin Jakobsdottir, avatangiisinut ministeria, Gudmundur Ingi Gudbrandsson Naalagaaffiit Peqatigiillu inuit pisinnaatitaaffiinut kommissæriat, Mary Robinson eqqaaniaanermi peqataapput.
Okjökull ukiut qulikkuutaat matuma siorna 15 kvadratkilometeriuvoq 50 meterimillu silissuseqarluni, maannali 1 kvadratkilometeriinnaavoq 15 meterimillu silissuseqarluni.
Sermeq aajuitsoq tassaavoq sermeq aasaanerani aannaasimasaminik ukiup ukiuunerani ilaqqittartoq.
Taamaaliortarunnaaraangamili serneerunnertut taaneqartarpoq. Okjökullilu 2014-imi taakkununnga ilannguppoq.
