Mittarfiup eqqaani sanaartorfik iserfigineqaranilu aniffioqqusaajunnaartoq
Nuuk tallimanngormat matuvoq. Illoqarfiimmi pingaarnersaanni coronamik tunillatsissimasut pingasut paasineqarput, taakkunanngalu ataaseq sumi tunillatsissimanersoq ilisimaneqanngilaq.
Tunillatsissimasut allat pingasut sapaatip akunnerata naanerani aamma paasineqarput, tunillatsissimasut arfinillit tamarmik Nuummi mittarfiliornermik suliaqartuupput.
Taamaammat sanaartorfik iserfigineqaranilu tassanngaanngaat anisoqannginnissaa pisariaqartoq, Tunillaassortunik nappaalasoqarneranut ataatsimiititaliarsuup maanna nalilerpaa.
Kalaallit Nunaanni Politiit tusagassiuutinut taama nalunaaruteqarput.
AAMMA ATUARUK Kalaallit Airports tunillatsittoqarnera pillugu: Sulineq ilisimasaqarnerulernissatta tungaanut uninngagallarpoq
Isersimaannartoqarnissaanut isertoqannginnissaanullu peqqussuteqarneq erngertumik atuutilersinneqarpoq, taannalu juunip ulluisa 17-iata tungaanut atuutissalluni.
Mittarfimmik sanaartornermi ineqarfiit avataanni coronamik tuniluuttoqalinnginnissaa qulakkeerniarlugu peqqussuteqarneq atuutilersinneqarpoq. Nuummimi mittarfimmik nutaamik sanaartornermik suliaqartup, Munck Gruppenip sulisui 80-it tamarmik ineqarfinniipput.
Taakku tamarmik angerlarsimaannartussaatitaapput.
Ungaluliineq nikissinnaasoq
Sumi sanaartortoqarnera apeqqutaatillugu ungaluliineq nikissinnaasoq politiit paasissutissiipput. Iserfigineqqusaanngitsumulli killiliussatut ungaloq ersarissuussaaq.
Mittarfimmik sanaartornermik suliaqartut nioqqutissanik pisariaqartunit pajutsittassapput. Nioqqutissanik aggiussisut qanermut kiinnamulluunniit assiaquteqassapput allanullu minnerpaamik 2 meterinik ungasitsigissallutik.
Tamatuma saniatigut ungalulersimasumiittut suli ikiorneqarsinnaallutillu coronamut misissortissinnaassapput.
Aneqqusaaffiunngitsumik unioqqutitsisoqassappat unioqqutitsisoq akiligassinneqassasoq politiit neriorsuipput.
Napparsimangaatsiartoqanngitsoq
Mittarfimmik sanaartorneq angersimaannartussaanik coronamik tunillatsissimasoqarnera pissutigalugu maanna uninngavoq. Kalaallit Airportsip pisortaanerata, Jens Lauridsen KNR-imut ippassaq oqaatigaa.
- Sulisut ineqarfimminniipput, peruluttoqarneranillu paasitinneqanngilanga. Oqartussanit maleruaqqusaasut ineqarfimmi malilluinnarneqarput.
- Mianerisassatut isigineqartut mattusimalluinnarput, Jens Lauridsen oqarpoq.
AAMMA ATUARUK Over 200 testet lørdag: Ingen nye smittede med corona
Kalaallit Airportsip mittarfiliorneq tamarmi akisussaaffigaa. Kalaallit Airportsip sanaartugassanik suliassinneqartartoq Munck Gruppen Nuummi mittarfimmik nutaamik aamma sanaartortitaraa.
Mittarfimmik sanaartornermut qanoq sunniuteqarpa?
- Ajuusaarnaqaaq sulisut sulisullu ineqarfiat mattunneqartariaqarsimammat, ingammik silagitsillugu angusaqarfiulluarsinnaagaluarmammi. Soorunami uggornarpoq.
- Mittarfiliornerlu ukiorpassuarni suliassaasoq eqqaamaneqassaaq, siunissaq ungasinnerusoq eqqarsaatigalugu annertunerusumik akornutaanissaa ilimananngilaq, Jens Lauridsen oqarpoq.
