Kalaallit Airports tunillatsittoqarnera pillugu: Sulineq ilisimasaqarnerulernissatta tungaanut uninngagallarpoq
Nuummi mittarfimmik sanaartornermik suliaqarfik ulappuffiugaluarlunilu nipiliorfiugaluartoq nipaappoq.
Sanaartorfimmi nalinginnaasumik qaartiterisoqartaralarpoq maskinallu angisuut ulloq unnuarlu ingerlaartarlutik. Sulisullu akornanni arfinillit tunillatsissimasutut paasineqarnerat pissutigalugu suna tamarmi uninngavoq.
Kalaallit Airportsip pisortaanera, Jens Lauridsen oqarpoq.
- Sulineq ullumikkoqqissaaq uninngavoq. Misissortinnissat tullii suliassallu tullii suussanersut oqartussat Munck Gruppenillu akornanni suleqatigiinnikkut paasiniarneqaqqissaarput.
AAMMA ATUARUK Nuummi tunillatsissimasoq mittarfissualiortuni sulisuusoq
Kalaallit Airportsip mittarfiliorneq tamarmi akisussaaffigaa. Kalaallit Airportsip sanaartugassanik suliassinneqartartoq Munck Gruppen Nuummi mittarfimmik nutaamik aamma sanaartortitaraa.
Munch Gruppenimili sulisut arfinillit coronamik tunillatsissimasuupput.
Taakku mittarfiup eqqaani najugaqarfimmi najugaqarput.
- Sulisut ineqarfimminniipput, peruluttoqarneranillu paasitinneqanngilanga. Oqartussanit maleruaqqusaasut ineqarfimmi malilluinnarneqarput.
- Mianerisassatut isigineqartut mattusimalluinnarput, Jens Lauridsen oqarpoq.
Suliffimmi tunillatsissimasut arfinillit
Tikinnermit ullut tallimassaanni misissortittut marluk tunillatsissimasut paasineqarput. Taakku tikinnerminnit angerlarsimaannarsimasuupput taakkulu mittarfimmik sanaartornermik suliaqartuullutik.
Taakku tunillatsissimanerisa paasineqarnerata aqaguani mittarfimmik sanaartortunit alla tunillatsissimasoq paasineqarpoq. Pineqartoq sapaatit akunnerisa arfinillit matuma siorna tikippoq, taannalu uppernarsarneqartunit marlunnit tunillatsissimanngitsutut Henrik L. Hansenip nalilerpaa. Taamaammat taanna sumi tunillatsissimanersoq ilisimaneqanngilaq – taannali Nuummi tunillatsissimalluni.
Assi: Munck Gruppenip mittarfiup eqqaani ineqarfia
Taamaammat illoqarfiit pingaarnersaanni tuniluuttoqaratarsinnaammat Naalakkersuisut Nuuk tallimanngormat matugallarpaat. Illoqarfiit pingaarnersaannit angallannerit unitsinneqarput, imerniartarfiit, neriniartarfiit timersortarfiillu matuneqarput tusarnaartitsinerillu unitsinneqarlutik. Innuttaasut pisiniarfinni bussinilu anersaartuutinut illersuuteqartussanngorput.
AAMMA ATUARUK Killilersuinerit atorunnaarsinneqarput: Nutaanik tunillatsissimasoqanngilaq
Munck Gruppenimi sulisut tamarmik angerlarsimaannartussanngortinneqarput amerlasoorpassuillu misissortillutik.
Sulisut suli ineqarfigisaminniiginnaqqusaapput – Nuulli ammaqqippoq.
Mittarfimmik sanaartornermeersut pingasut allat covid-19-imik aamma tunillatsissimasut arfininngormat paasineqarpoq. Taamaalilluni tunillatsissimasutut uppernarsarneqarsimasut katillugit arfinilinngorput.
- Tuniluuttoqarnerata nakkutigineqarlualernissaa pingaarnerpaavoq. Ulluinnarnut nalinginnaasunut uteqqinnissarput sulissutigaarput. Tamanna ukkatarineqarpoq, Jens Lauridsen oqarpoq.
- Tamanna kingunerluutaassanersoq sanaartugassanik suliassinneqartartullu oqaluuserineqassaaq, pissutsinilli nakkutiginnissinnaalernissaq matumani ukkatarineqarpoq, Jens Lauridsen oqarpoq.
Tunillatsissimasutut uppersarneqartut peqqisseqqippata aatsaat suliaqartoqaqqilissava?
- Taanna akisinnaanngilara. Tamanna oqartussat Munck Gruppenillu akornanni toqqaannartumik ataqatigiissaarneqarpoq. Tamanna ingerlaavartumik oqallisigineqarpoq.
Mittarfimmik sanaartornermut qanoq sunniuteqarpa?
- Ajuusaarnaqaaq sulisut sulisullu ineqarfiat mattunneqartariaqarsimammat, ingammik silagitsillugu angusaqarfiulluarsinnaagaluarmammi. Soorunami uggornarpoq.
- Mittarfiliornerlu ukiorpassuarni suliassaasoq eqqaamaneqassaaq, siunissaq ungasinnerusoq eqqarsaatigalugu annertunerusumik akornutaanissaa ilimananngilaq, Jens Lauridsen oqarpoq.
