Nuummi tunillatsissimasoq mittarfissualiortuni sulisuusoq
![](/sites/default/files/styles/image_934x467/public/article_images/dsc01750.jpg?itok=AMKPbBHz)
Coronavirusertoq ippassaq siumorneqartoq Munch Gruppenimi sulisuuvoq.
Nunatta nakorsaaneqarfiani nakorsaasoq Paneeraq Noahsen tusagassiortunik ullumi katersortitsisoqarmat taama oqarpoq.
Munch Gruppen Nuummi mittarfissualiortuupput.
Innuttaasut tamarmik tunillaassuuttoqarnissaanut aarlerinaatit annikillisinniarlugit maleruagassanik eqqumaffiginnilluinnarnissaat innersuussutigineqarpoq:
- Qanillinaveersaarit.
- Assavit eqqiluitsuutinnissaat eqqaamajuk.
- Nappaammut ersiuteqaruit angerlarsimaannarit, misissortinnissarlu siunertaralugu erngertumik najukkanni napparsimaveqarfik attavigiuk.
- Munck Gruppenimi sulisut allat tunillatsissimanersut paasinissaat massakkut pingaarnersaavoq. Munck Gruppenimimi allanik tunillatsittoqarsimanngippat suliffeqarfimmi sulisunik allanik misissueqqinnissaq pisariaqanngilaq. Taamaasimassappammi allanut tuniluusimanissaa ilimanaateqarnavianngilaq, taanna oqarpoq.
Tunillatsissimasoq sapaatit akunneri arfinillit nunatsinneereerpoq. Nuummi pineqartoq arfininngormat neriniartarfik Herefordimiippoq, imerniartarfinnilu Skylinemi Daddysimilu – taamaattumillu allanik tunillaasimanissaa ilimanaateqarluni.
Taamaatumillu illoqarfik ilaanakortumik ullumi matuneqarpoq – cafét, neriniartarfiit, imerniartarfiit, timersortarfiit, naluttarfik isiginnaartarfillu ullumimiit ataasinngorneq ilanngillugu matoqqatinneqarput.
Munch Gruppenimeersut sulisut allat marluk sapaatip akunnerata siuliani misissorneqaramik coronaviruseqartut aamma siumorneqarput. Ullut tallimassaani misissorteqqinnerminni paasineqarput akuliusimanaveersaarlutillu - taamaattumillu suleqatertik tunillassimanagu.
- Munck Gruppenimi sulisut marluk tunillatsissimasut suleqataalu aamma tunillatsisimasoq nalunngereerparput, tusagassiortunut ullumi katersortitsisoqarmat Naalakkersuisut siulittaasuat, Múte Bourup Egede, oqarpoq.
Napparsimasoq perulunnanili
Hereford, Daddys Skylineluunniit arfininngormat maajip ulluisa 22-anni isersimasut tamarmik coronavirusimut misissortissasut piumaffigineqarput. Arlallit piumasaqaat malippaat - taamaattumillu Brugsenip eqqaani misissuisarfimmiit illoqarfiup qeqqani Hotel Hans Egede tikillugu tunuleriiaartoqarluni.
Sapaatip akunnerata naanerani misissuinersuup inerneri paasineqassapput – qanorlu inerneqarnersut apeqqutaalluni illoqarfiup pingaarnersaani killilersuutit ataasinngornermi unissapput nanginneqarlutilluunniit. Sukaterneqarsinnaallutilluuniit, tusagassiortunut ullumi katersortitsisoqarmat Naalakkersuisut siulittaasuat Múte B. Egede oqarpoq.
AAMMA ATUARUK Herefordimi, Skylinemi Daddysimiluunnit arfininngormat isersimavit? Taava coronamut misissortissaatit
Much Gruppenimi sulisut 80-t missaaniittut akuliunnaveersaaqqusaasimasut Paneeraq Noahsenip oqaatigaa. Ullaarli nalunaaqqutaq arfineq pingasunullu ataatsikkut misissugaritipput.
Nunatta napparsimaveqarfiani nakorsaq Paneeraq Noahsenip oqarnera naapertorlugu tunillatsissimasoq napparsimavoq - taannali perulunngilaq.
- Pineqartoq napparsimavoq perulunngilarli. Pineqartoq napparsimmavimmut unitsinneqanngilaq. Kisianni nalunngilarput piffissap sivikitsup ingerlanerani allanngortoqarsinnaasoq, taanna oqarpoq.
KNR-i Much Gruppenimit Kalaallit Airportsimiillu ullumi oqaaseqartitsiniaraluarpoq.
Pisoq pillugu qanoq suliffeqarfinniit iliuuseqarfigineqarsimaneranik sulisullu qanoq inneranik apeqquteqarusussimagaluarpugut.
Akissutisisimasinnaasimanatalu.
Kalaallit Airports Facebookikkut ataatsimik paasissutissiissimavoq. Mittarfilioqataasuni sanasut akornanni tunillatsissimasoqartoq KAIRip uppernarsarpaa.
Kalaallit Airportsimi pisortaaneq Jens Lauridsen allappoq:
- Attuumassuteqartunut tamanut tuniluussimaneq ajuusaarnarpoq. Pisoq ilungersunarpoq, tuniluuttulli suminngaaneerseranik peqqinnissaqarfiup suliffeqarfiullu suleqatigiillutik ilungersorlutik paasiniaasut nalunngilarput.
Ilulissani ukioq kingulleq aamma taama pisoqarpoq
Munck Gruppenimiit siullermeertumik coronavirusertoqalinngilaq. Kalaallit Airports sinnerlugu Ilulissani Munck Gruppeni mittarfissualiortuusumi aamma siorna pivoq.
Tunillatsissimasoq Kalaallit Nunaanut ukioq kingulleq maajip 19-iani tikippoq, maajip 25-ianili misissorteqqilluni. Pineqartoq aallannginnermini misissortikkami tunillatsissimanngilaq ersiuteqaranilu. Taamaakkaluartoq pineqartoq timimini coronaviruseqarpoq. Pineqartormi Ilulissani maajip 25-iani misissorteqqikkami coronaviruseqartoq siumorneqarpoq.
AAMMA ATUARUK Nakorsaaneq Ilulissani coronamik tunillatsittoqarnera pillugu: Malittarisassat ilaat malinneqanngillat
Taamani Ilulissani kommunimi sulisut qulit suliffimminit angerlartinneqarput, tunillatsissimasormi kommunimi ataatsimiissimammat.
Corona pillugu aqutsisoqarfimmiit akuerisaallutik aqaguani suliartoqqipput.
Killilersuutit makku ullumikkumiit atuutinneqalerput:
- Maannakkumit ataasinngornerlu ilanngullugu Nuummiit angalanerit unitsinneqarput.
- Pisariaqavinngitsumik Nuummut angalanak.
- Sinersortaat Nuummiit ullumi aallassaaq, Nuummiilli ilaasoqassanngilaq. Illoqarfiit pingaarnersaanit angalasussanik ikisoqassanngilaq.
- Tunillatsissimasutut uppernarsarneqarsimasut pingasut suliffigisaanni sulisut tamarmik angerlarsimaannartinneqarput. Taakku misissortinnerat ullaaq arfineq pingasunut aallartinneqarpoq.
- Imerniartarfiit, timersortarfiit tusarnaartitsinerit ataasinngorneq ilanngullugu matuneqarput. Tamanna sivitsorneqaratarsinnaavoq.
- Inunnit ornigarneqarsinnaasuni - matumani pisiniarfiit ilanngullugit anersaartuutinut illersuuteqarfiunissaat piumasaqaataalerpoq.
- Bussini aqqaneq-marluleereersimasut tamarmik anersaartuutinut illersuuteqassapput, bussinilu issiaviusinnaasunit amerlanerusunik ilaasoqassanngilaq.
- Nuummi 50-init 64-inut ukiullit akornanni akiuussutissamik kapuinerit sukkatsisinneqarput. Taakku sapaatip akunnerata tullianit akiuussuserneqassapput.