Herefordimi, Skylinemi Daddysimiluunnit arfininngormat isersimavit? Taava coronamut misissortissaatit
Herefordimi, Daddysimi Skylinemiluunniit arfininngorneq marsip ulluisa 22-anni isersimasimaguit misissortissaatit.
Coronamik tunillatsissimasoq sumiiffinni taakkuni pingasuni isersimasimavoq - taamaammat Brugsenip eqqaani misissuisarfik sumiiffinni taakkunani pingasuniissimasut misissortinnissaannut nalunaaqutaq 12.30-mit ammassaaq.
Nakorsaaneqarfimmit nakorsaq, Paneeraq Noahsen tusagassiortunik katersortitsinermi oqarpoq.
Tunillatsissimasutut uppernarsarneqartoq sapaatit akunnerini arfinilinni nunatsinniissimavoq. Taannalu pingasunngormat napparsimalerpoq, taassuma misissortinnerata tunillatsissimasoq sisamanngornermi uppernarsarpaa.
Pineqartoq Nuummi imerniartarfissiorsimavoq, taannalu kimit tunillatsissimanersoq ilisimaneqanngilaq. Taamaammat Nuummi inuiaqatigiinni maanna tuniluuttoqarsinnaavoq
AAMMA ATUARUK Nuummi killilersuinerit sukaterneqarput
Paneeraq Noahsenip oqarnera naapertorlugu ukunaniissimaguit misissortissaatit:
Arfininngorneq maajip ulluisa 22-anni nalunaaqutaq 19-imit Herefordimiissimaguit.
Aamma unnuap qeqqata missaanit unnuami marluk missaanut Skylinemiissimaguit aamma Daddysimiissimaguit.
Misissuisarfiup eqqaani ullup qeqqanngitsorli siuleriiaattoqalereerpoq.
Nuummi misissuisarfiup eqqaani siuleriiaattut. Assi: KNR
Paneeraq Noahsenip oqarnera naapertorlugu tunillatsissimasoq napparsimasoq - taannali perulunngilaq.
- Pineqartoq napparsimavoq perulunngilarli. Pineqartoq napparsimmavimmut unitsinneqanngilaq. Kisianni nalunngilarput piffissap sivikitsup ingerlanerani allanngortoqarsinnaasoq.
Tunillatsissimasunik marlunnik Nuummi pingasunngornermi uppernarsaasoqarpoq. Taakku marluk nakorsaanerup oqarnera naapertorlugu tunillatsissimasutut ippassaq uppernarsarneqarsimasumut attuumassuteqanngillat. Taakkumi marluk tikinnerminniilli angerlarsimaannarsimapput.
Tunillatsissimasutut uppernarsarneqartut Danmarkimut nunatsinnut tikeqqammerput. Taakkulu tikinnerminnit ullut tallimassaanni marlunngormat unnukkut misissortinneranni tunillatsissimasut paasineqarpoq.
Tunillatsissimasutut uppernarsarneqartoq kingulleq nunatsinnut sapaatit akunneri arfinillit matuma siorna tikippoq - taannalu sumi tunillatsissimanersoq ilisimaneqanngilaq.
AAMMA ATUARUK Tamaat isigalugu: Coronavirus pillugu killiffik
Taamaakkaluartorli nakorsaaneq eqqissisaavoq:
- Ukiup ataatsip matuma siornanit pissutsit allaanerupput. Aarlerinarnerpaamiittut akiuussutissamik kapitinnikuupput, nakorsaaneq KNR-imut oqarpoq.
- Ukiup ataatsip affaatalu ingerlanerani oqaluuserisimasagut puiorneqalersimasulli atoqqinneqalissapput, Henrik L. Hansen oqarpoq.
Innuttaasut tamarmik tunillaassuuttoqarnissaanut aarlerinaatit annikillisinniarlugit maleruagassanik eqqumaffiginnilluinnarnissaat innersuussutigineqarpoq:
- Qanillinaveersaarit.
- Assavit eqqiluitsuutinnissaat eqqaamajuk.
- Nappaammut ersiuteqaruit angerlarsimaannarit, misissortinnissarlu siunertaralugu erngertumik najukkanni napparsimaveqarfik attavigiuk.
