Nuummi killilersuinerit sukaterneqarput

Nuummi nappaammik tuniluuttoqaratarsinnaavoq – taamaammat illoqarfiit pingaarnersaanni maannakkumit ataasinngorneq ilanngullugu killilersuinerit sukaterneqangaartsiarput.

Naalakkersuisut siulittaasuat, Múte B. Egede (IA) tusagassiortunik katersortitsinermi oqarpoq:

Illoqarfiit pingarnersaanni tunillatsissimasutut uppernarsarneqarsimasut pingasuupput. Amerlanerusut tunillatsissimasinnaapput. Taamaammat ima iliortoqassaaq:

• Maannakkumit ataasinngornerlu ilanngullugu Nuummiit angalanerit unitsinneqarput.
• Pisariaqavinngitsumik Nuummut angalanak.
• Sinersortaat Nuummiit ullumi aallassaaq, Nuummiilli ilaasoqassanngilaq. Illoqarfiit pingaarnersaanit angalasussanik ikisoqassanngilaq.
• Tunillatsissimasutut uppernarsarneqarsimasut pingasut suliffigisaanni sulisut tamarmik angerlarsimaannartinneqarput. Taakku misissortinnerat ullaaq arfineq pingasunut aallartinneqarpoq.
• Imerniartarfiit, timersortarfiit tusarnaartitsinerit ataasinngorneq ilanngullugu matuneqarput. Tamanna sivitsorneqaratarsinnaavoq.
• Inunnit ornigarneqarsinnaasuni - matumani pisiniarfiit ilanngullugit anersaartuutinut illersuuteqarfiunissaat piumasaqaataalerpoq.
• Bussini aqqaneq-marluleereersimasut tamarmik anersaartuutinut illersuuteqassapput, bussinilu issiaviusinnaasunit amerlanerusunik ilaasoqassanngilaq.
• Nuummi 50-init 64-inut ukiullit akornanni akiuussutissamik kapuinerit sukkatsisinneqarput. Taakku sapaatip akunnerata tullianit akiuussuserneqassapput.

Tunillatsissimasoq ippassaq paasineqartoq sapaatip akunneri arfinillit nunatsinniippoq, taamaammallu nunatta avataani tunillatsissimasinnaanngilluinnartoq, nakorsaaneq, Henrik L. Hansen KNR-ip ullaap tungaani oqarpoq.

- Tunillatsissimasoq paasisarput kingulleq nunatsinneereersuuvoq, angalaqqamminngilaq, tamanna ajornartorsiutaavoq.

- Tunillatsissimasoq ersiuteqarluni napparsimmavimmukarmat, coronamik tunillatsissimasuusoq paasivarput. Sumi kimillu tunillatsissimanersoq ilisimanngilarput, tamanna paasinialeruttorparput. Taamaammat sumit tunillatsissimasinnaanerata erngertumik paasiniarnissaa pingaaruteqarpoq. Tamannalu paasinialeruttorparput.

Daddys, Skyline og Hereford

Inuit Daddysimi, Herefordimi Skylinemilu sapaatip akunnerata siuliani arfininngornermi unnukkut isersimasimasut Brugsenip eqqaani misissuisarfimmi misissortissapput.

Killilersuinerit nutaat qanoq sivisutigisumik atuutissanersut Múte B. Egedep maanna oqaatigisinnaanngikkallarpaa:

- Pissutsit atatsimut takusinnaalerniarsarivagut, sapaatip akunnerata naanerata ingerlanerani ilisimasaqarnerulissaagut. Tuniluuttoqarsinnaanerata siaruaatinnginnissaa pissutigalugu piumasaqaatiliivugut, naalakkersuisut siulittaasuat oqarpoq.

AAMMA ATUARUK Herefordimi, Skylinemi Daddysimiluunnit arfininngormat isersimavit? Taava coronamut misissortissaatit

- Tuniluuttoqarfiusinnaasup paasiniarnera unnuaq aallartinneqarpoq. Killilersiuinerit sivitsussanerigut - imaluunniit sukateqqissanerigut sapaatip akunnerata naanerani paasisaqarnissarput apeqqutaassaaq. Sumit tunillaasoqarnera ilisimanngilarput - tamanna pissutigalugu pissutsit maanna ilungersunarput. 

Pingasunit tunillatsissimasutut Nuummi uppernarsarneqarsimasunit amerlanerusut tunillatsissimanersut suli ilisimaneqanngilaq.

Misissuinerpassuit ullaaq arfineq pingasunut aallartinneqartut sapaatip akunnerata naanerata ingerlanerani akissutersissavagut. 

Tunillatsissimasutut uppernarsarneqartoq suliffeqarfimmi angisuumi sulisuuvoq, suliffeqarfimmi tassani sulisut 80-it missaanniittut maanna angerlarsimaannartinneqarpoq, coronamullu misissortileruttorlutik.

Politiit: Umiatsiamik angalaarsinnaavusi pisuttuarsinnaallusilu

Nunaqarfinnit Kapisilinnit Qeqertarsuatsiaaniillu Nuummukartoqannginnissaa Naalakkersuisut kaammattuutigaat. Illoqarfiimmi pingaarnersaannit inuit nunaqarfinnukaqqusaanngilaq.

Tamanna inuit umiatsiamik angalaarnissaannut aporfiussanngitsoq, Kalaallit Nunaanni Politiit oqarput.

- Illoqarfiup innuttaasuisa Nuummiiginnarnissaat killilerneqaraluartoq taakku umiatsiamik angalaarsinnaallutillu qaqqanut assigisaanullu pisuttuarsinnaapput. Taakkuli nunaqarfinni qanittuniittuni innuttaasunut qanillinnginnissaat Nuummullu uteqqinnissaat piumasaqaataavoq, Politiit oqarput.

Tunillatsissimasunik marlunnik Nuummi pingasunngornermi uppernarsaasoqarpoq. Taakku marluk nakorsaanerup oqarnera naapertorlugu tunillatsissimasutut ippassaq uppernarsarneqarsimasumut attuumassuteqanngillat. Taakkumi marluk tikinnerminniilli angerlarsimaannarsimapput.

Tunillatsissimasutut uppernarsarneqartut Danmarkimut nunatsinnut tikeqqammerput. Taakkulu tikinnerminnit ullut tallimassaanni marlunngormat unnukkut misissortinneranni tunillatsissimasut paasineqarpoq.

AAMMA ATUARUK Tamaat isigalugu: Coronavirus pillugu killiffik

Tunillatsissimasutut uppernarsarneqartoq kingulleq nunatsinnut sapaatit akunneri arfinillit matuma siorna tikippoq - taannalu sumi tunillatsissimanersoq ilisimaneqanngilaq.

Taamaakkaluartorli nakorsaaneq eqqissisaavoq:

- Ukiup ataatsip matuma siornanit pissutsit allaanerupput. Aarlerinarnerpaamiittut akiuussutissamik kapitinnikuupput, nakorsaaneq KNR-imut oqarpoq.

- Ukiup ataatsip affaatalu ingerlanerani oqaluuserisimasagut puiorneqalersimasulli atoqqinneqalissapput, Henrik L. Hansen oqarpoq.

Innuttaasut tamarmik tunillaassuuttoqarnissaanut aarlerinaatit annikillisinniarlugit maleruagassanik eqqumaffiginnilluinnarnissaat innersuussutigineqarpoq:

• Qanillinaveersaarit.
• Assavit eqqiluitsuutinnissaat eqqaamajuk.
• Nappaammut ersiuteqaruit angerlarsimaannarit, misissortinnissarlu siunertaralugu erngertumik najukkanni napparsimaveqarfik attavigiuk.