Aaqqissuisoq: Mittarfinnut isumaqatigiinnginnerup naalakkersuisoqatigiit uppisissinnaavaa
![](/sites/default/files/styles/image_934x467/public/poul_krarup.png?itok=-K__Sdyc)
Partiit naalakkersuisuutitaqartut Inatsisartuni 16-inik ilaasortaatitaqarmata, partiit tamarmik pingaaruteqarput. Partiit taakku ilaanniittut Partii Naleqqameersut, mittarfiliorniarnernut inatsisissamut akuerseqataassanerlutik suli nalornipput.
-Inuiaqatigiinni aningaasat taama annertutigisumik sunniuteqartussat sukumiisumik ataatsimiitsitaliami suliaralugit ataatsimiitsitaliaq isumaliutissiissutimini oqariartuuteqartariaqarmat 1.199 meterit taakku aamma misissuiffigineqarnikuuneri ingerlanneqarnikuummata, tunaartai paasissutissat taakkua ilanngullugit saqqummiunneqarnissaat uagut tungitsinniit taasimavarput, Partii Naleqqap politikkikkut oqaaseqartartua, Jens Napatok oqarpoq.
Suliamut pingaaruteqaqisumut isumaqatigiinngutsut
Taassumalu Qanoruumut oqaasii, aviisip Sermitsiap aaqqissuisuunerata, Poul Krarupip tupaatigisimavai.
- Isumaqarpunga ajornartorsiortoqartoq, Naalakkersuisunngortitsisoqaqqammerpormi. Suliaq taamak pingaaruteqartigisoq isumaqatigiittoqanngitsoq paasinarpoq. Qanoruup ippassaq aallakaatinnerani erserpoq apeqqutit akineqarsinnaanngitsut, taamaalilluni paasinarsivoq isumaqatigiinngitsoqartoq. Apeqqummi tassa suliami taama pingaaruteqartigisumi ilimagineqarsinnaagaluarpoq Naalakkersuisooqatigiit naalakkersuisut politikkiannut tamakkiisumik tapersersuissasut, Poul Krarup oqarpoq.
AAMMA ATUARUK Nuummi mittarfimmut suliniut kinguaattoorsinnaavoq
Tassalu naalakkersuisoqatigiit akornanni ajornartorsiortoqarpasittoq, taanna isumaqarpoq.
Partii Naleraq mittarfissat siunnersuutigineqartumit allanik takissuseqarnissaat pillugu qineqqusaaruteqartoq, aaqqissuisup nunatsinni ukiuni 32-ni sulereersup nalunngilaa. Naalakkersuisoqatigiinnissamulli isumaqatigiinniarnerni mittarfissat takissusissaannut isumaqatigiissuteqarsimasorigaluarpaa.
Isumaqatigiinniarnerni isumaqatigiissuteqartoqartariaqaraluartoq
- Partii Naleraq qineqqusaarnerup nalaanili oqarpoq mittarfiup takissusissaanik allaanerusumik kissaateqarlutik. Isumaqarsimagaluarpungali naalakkersuisooqatigiilernermi isumaqatiginninniarnerni tamanna inissinneqarsimassasoq tassa Naalakkersuisooqatigiilersut politikkissaat isumaqatigiissutigineqarluni, Poul Krarup oqarpoq.
Mittarfiit pillugit isumaqatigiinnginneq pissutigalugit Kim Kielsen nutaanik naalakkersuisoqatigiiliortariaqarsinnaassasoq, Krarup naliliivoq.
- Naalakkersuisoqatigiinnik nutaanik pilersitsisoqajaarsinnaassasoq takorloorsinnaavara.
AAMMA ATUARUK Sanaartornermi suliassat neqeroortitsivigineqarnissaa Kalaallit Airportsip kinguartikkallarpaa
Inatsisartut mittarfiliortiterniarnernut siullermeerinnereersullu Partii Naleqqap taama ersaritsigisumik akerliliinnera partiip iluani aaqqiagiinngissuteqartoqarneranik ersertitsisuusinnaasoq aaaqqissuisuunerup nalilerpaa.
- Isumaqarpunga Partii Naleqqami pissaaneqarniuttoqartoq, Partii Naleqqami ajornartorsiuteqarput. Isumaqarpunga Hans Enoksenip parteeqatini aqussinnaanngikkai, Poul Krarup oqarpoq.
AAMMA ATUARUK Kalaallit Airports mittarfiit takinerit tunngavigalugit suliinnassaaq