Simon Simonsen: Kalaallit Airports mittarfiit takinerit tunngavigalugit suliinnassaaq
Kalaallit Airportsimi siulersuisuni siulittaasup Johannus Egholm Hansenip mittarfissat sanaartornissaannut nunani tamalaani neqeroortitsinissap kinguartinneqarsinnaaneranik ilimasaarutigaa.
Siulersuisuni siulittaasoq naapertorlugu, mittarfiit sanaartorneqarnissaat pillugu inatsisip ataasinngormat siullermeerneqarnerani mittarfiit qanoq takitiginissaannik politikerit kissaateqarnersut nalornissutigineqalerpoq.
Kalaallit Airportsili ernumassuteqartariaqanngitsoq, Attaveqaqatigiinnermut naalakkersuisup Simon Simonsenip oqaatigaa.
- Mittarfiit takissusissaannik Inatsisartut 2015-imi siulikkiissutaat, tassalu Ilulissani Nuummilu mittarfiit 2200 meteriunissaannik kiisalu Qaqortumi mittarfissap 1500 meterisut takitiginissaaanik suliaq aallaavigalugit ingerlavoq, - allanngortoqarnikuunngilaq taannalu malillugu inatsisartut akileraartarnermut aningaasaqarnermullu ataatsimiititaliami suliarineqalerpoq, Ineqarnermut Attaveqaqatigiinnermullu Naalakkersuisoq Simon Simonsen taama oqarpoq.
AAMMA ATUARUK Neqeroortitsinissaq kinguartinneqarsinnaavoq
Nuummi Ilulissanilu mittarfiit 2200 meteriunissaat Qaqortumilu mittarfiup 1500 meteriunissaa Inatsisartuni 2015-imi aalajangiunneqarpoq.
Kalaallit Airportsillu mittarfiit takissusissaat taakku tunngavigalugit sulinerminik ingerlatsiinnarnissaa Simon Simonsenip kissaatigigaluaraa, allanngortinneqarsinnaanerat suli periarfissaavoq. Tamannami Inatsisartunit inaarutaasumik aalajangiiffigineqartussaavoq.
Partiip naalakkersuisooqataasup Partii Naleqqap ataasinngormat siunnersuutigaa mittarfinnik naannerusunik sanaartortoqarsinnaaneranut periarfissat missorneqassasut.
AAMMA ATUARUK Partii Naleqqap mittarfiit takissusissaannut periarfissat allat misissortikkusukkai
Tamannalu mittarfiit takissusissaat 2015-imi aalajangiunneqartut pillugit nalornilernermik pilersitsivoq. Tamannalu ajuusaarnartoq, Kalaallit Airportsimi siulersuisuni siulittaasoq Johannus Egholm Hansen isumaqarpoq:
- Aalajangiineq taanna pillugu nalorninermik pilersitsisoqarpoq. Taamatut pisoqarnera sanaartortussamut taarsigassarsisitsisussanullu isumaqatigiinniarfigisassatsinnut pitsaavallaanngilaq. Taamatut pisoqarnera ajuusaarnartippara. Illuatungaatigulli aamma ataqqivarput Inatsisartut tassaammata sunik sanaartortoqarnissaanik aalajangiisussat.
Kalaallit Airportsimi siulersuisut sisamanngorpat ataatsimiittussaapput nunanilu tamalaani neqeroortitsinissaq kinguartinneqassasoq matumani aalajangiiffigissavaat.
AAMMA ATUARUK Mittarfiit sanaartornissaannut inatsisissaq ukiaru oqaluuserineqassaaq
