Kalaallit Airports: Nuummi mittarfimmut suliniut kinguaattoorsinnaavoq
Kalaallit Airportsip Nuummi Ilulissanilu mittarfinnut sanaartornermi suliassat neqeroortitsivigineqarnissaat mittarfiit takissusissaat politikerinit aalajangerneqarnissaata tungaanut kinguartikkallarai, piginneqatigiiffiup siulersuisui tallimanngormat nalunaarput.
Kalaallit Airportsip pisortaa, Steffen Ulrich-Lynge allakkatigut akissummi KNR-mut ima allappoq:
- Sanaartugassanik suliassinneqartartut neqeroorutitik sivikinnerpamik qaammatit pingajuat avillugu naatsorsortussaavaat, tassalu neqeroortitsivigineqarnissaannut atortut sanaartugassanik suliassinneqartartunut qaqugu nassiussinnaanerigut apeqqutaalluni Nuummut suliniut kinguartinneqassaaq, pisortaq allappoq.
Nuummi mittarfimmik sanaartorneq sivisunerusoq
Kalaallit Airport Nuummi, Ilulissani Qaqortumilu mittarfinnik sanaartortitsissaaq, piginneqatigiiffiullu anguniagassatut pilersaarutaa naapertorlugu, mittarfiit pingasut oktobarimi 2022-mi naammassineqareertussaapput.
AAMMA ATUARUK Sanaartornermi suliassat neqeroortitsivigineqarnissaa Kalaallit Airportsip kinguartikkallarpaa
Nuummili mittarfimmut suliap pilersaarutigineqartutut naammassineqarnissaa ajornakusoorsinnaavoq.
- Ilulissani 2019-imi aallartinnissaq pilersaarutigigatsigu, taanna maannakkut ilungersunarpallaanngilaq. Nuummi mittarfiup pioreersup qaavani ingerlaneranilu mittarfik nutaaq suliarisussaagatsigu Nuummi sanaartorneq sivisunerussasoq oqaatigilaassavara, Steffen Ulrich-Lynge allappoq.
Pisortaq naapertorlugu, Nuummi Ilulissanilu mittarfissanut sanaartornermi suliassat maajip ulluisa 20-anni neqeroortitsivigineqareertussaagaluarput. Pilersaarutigineqartutut ingerlasimasuuppat, piginneqatigiiffik sanaartugassanik suliassinneqartartunik septembarimi toqqaasinnaassagaluarpoq, tamatumalu kingorna sanaartorneq aallartinneqarsinnaassagaluarluni.
AAMMA ATUARUK Immikkut ittumik ataatsimeeqqittoqarnissaa Simon Simonsenip naatsorsuutigaa
AAMMA ATUARUK Nunatsinni attaveqarneq tamakkerlugu isiginiarneqartariaqarpoq