Olsvig: Nunatsinni attaveqarneq tamakkerlugu isiginiarneqartariaqarpoq

Partiip illuatungiliuttup, Inuit Ataqatigiit, mittarfiit nutaat pillugit inatsit naammaginartinngilaa:

- Maannakkorpiaq qularnartitarput tassaavoq isumaliutissiissummi 2015-imeersumi mittarfiit pillugit suliniutit pingasut pillugit aamma Kangerlussuup Narsarsuullu isummerfiginissaannik Naalakkersuisut suliaqarnissamut suliakkerneqarsimammata. Naalakkersuisulli aamma peqquneqarput nunatsinni illoqarfiit allat isummerfigissallugit angallannikkullu aaqqissuussineq tamakkiisumik misissuiffigissagaat, Inuit Ataqatigiit siulittaasuat Sara Olsvig oqarpoq.

Aalajangiiffigisassatut siunnersuutip 2015-imeersup, mittarfiliortiternermi toqqammavigineqartup, Naalakkersuisut nunamut tamarmut tunngatillugu nunap immikkoortuini attaveqarnermut pilersaarummik ataatsimoortumik saqqummiussinissaannik imaqarnera eqqaasitsissutigaa.

KAIR-ip suliamik aallartitsinissaanut ataatsimiititaliaq akuersissuteqartoq

Attaveqaqatigiinnermut naalakkersuisoq Simon Simonsen pingasunngormat tusagassiortunik katersortitsivoq. Mittarfiit pillugit aalajangiinerup ingerlanneqarnera matumani sammineqarpoq, qulequtarineqartorlu tassaavoq aalajangiinissaq tuaviuunneqarsimanngitsoq, paarlattuanillu suliniutip ingerlateqqinneqarnissaa qinigaaffimmi kingullermi Inatsisartuni partiinit tamanit peqataaffigineqartoq.

Inuit Ataqatigiilli Nuummi, Ilulissani Qaqortumilu mittarfiit pillugit suliap siuarsarnissaanut peqataasimanerat Sara Olsvigip nassuerutigaa. Kingullermik ukiaq, Inuit Ataqatigiit Naalakkersuisooqataanerminni aamma aningaasaqarnermut akileraartarnermullu ataatsimiititaliamiinnerminni Kalaallit Airportsip suliniutinik pingasuusunik aallartitsinissaanut akuerseqataammata.

AAMMA ATUARUK Neqeroortitsinissaq kinguartinneqarsinnaavoq

Inatsimmut sulisut nunanit allaneersut mittarfinnik sanaartortussat akileraarutaasa kommuninut tunniunneqaratik nunatta karsianut tunniunneqarnissaannik imaqartumut Inuit Ataqatigiit akuerseqataapput.

Olsvig: Aningaasalersuinissaq periarfissaannaavoq

2018-imut aningaasanut inatsimmi oqaasertaliussat, Naalakkersuisut Kalaallit Airportsimut 2,1 milliardit koruunit pallillugit aningaasaliisinnaanerannik periarfissiisut partiimit aamma akuersissutigineqarput.

- Pissusissamisoorsorinngisatsinnik naammattuugaqaraangatta isumarput annittarparput, matumanilu aamma taamaaliorpugut.

Taamaakkaluartoq aningaasanut inatsimmi oqaasertaliussat akuerseqataaffigivasi?

- Aningaasalersuinissamut periarfissaqarpoq. Aamma aningaasalersuinissap inaarutaasup ukiap ingerlanerani aalajangiiffigineqarnissaa Inatsisartut ataatsimiittarfianni erseqqilluinnartumik oqaatigineqarpoq, Sara Olsvig oqarpoq.

Aningaasaqarnermut akileraartarnermullu ataatsimiititaliami allatsi Sakarias Amondsen naapertorlugu, aningaasanut inatsimmut oqaasertaliussaq inatsimmi aalajangersakkatut isigineqartussaavoq.

Naalakkersuisut Kalaallit Airportsimut 2,1 milliardit koruuninik aningaasaliinissaat ukioq mannamut aningaasanut inatsisissami oqaasertaliussani akuerineqarnerata saniatigut, Naalakkersuisut mittarfiit sanaartornissaannut nunani tamalaani neqeroortitsinissaat aamma akuerineqarpoq.

AAMMA ATUARUK Immikkut ittumik ataatsimeeqqittoqarnissaa Simon Simonsenip naatsorsuutigaa