Mittarfiit: Immikkut ittumik ataatsimeeqqittoqarnissaa Simon Simonsenip naatsorsuutigaa
Mittarfiit pillugit inatsisip aasamut naammassineqarnissaanik Siumup kissaatigisaataata naammassineqarnissaanut periarfissaq Attaveqaqatigiinnermut naalakkersuisup taamaalilluni ammatippaa.
Mittarfittaassat sanaartorneqarnissaat ingerlanneqarnissaallu pillugit inatsit Inatsisartut ukiaanerani ataatsimiinneranni naammassillugu suliarineqartussaavoq. Inatsisissap siullermeerneqarnera ataasinngormat unnukkut naammassineqarmat tamanna aalajangiunneqarpoq.
Attaveqaqatigiinnermulli naalakkersuisup Simon Simonsenip tamanna siusinnerusukkut pissangatippaa, aningaasaqarnermut akileraartarnermullu ataatsimiititaliap ukiartinnagu naammassinissaa naatsorsuutigigamiuk.
- Ataatsimiititaliaq sulissooq, taannalu utaqqissavarput. Ataatsimiititaliaq piareeruni noqaqaassuteqartussaavoq aappassaaneerinninnissamut pingajussaaneerinninnissamullu, Simon Simonsen oqarpoq.
AAMMA ATUARUK Neqeroortitsinissaq kinguartinneqarsinnaavoq
Inatsisip juulip aallartinnerani naammassillugu suliarineqarnissaa naalakkersuisooqatigiit Siumumit siuttuuffigineqartut kissaatigigaluarpaat. Ukiamulli pinissaa Siumup ataasinngormat unnulersoq akueraa, Inatsisartunili ingerlateqqinnissaanut ataatsimiititaliap qaqugu piareernissaa apeqqutaatillugu.
Tamannaavorlu Simon Simonsenip tunngavigisaa.
- Takussavarput oqallinnermi apeqqutigineqartorpassuit nassuiaateqarfigeqquneqartullu akinissaannut piffissaq qanoq sivisutigisoq atussaneraat, naalakkersuisoq oqarpoq.
AAMMA ATUARUK Mittarfiit sanaartornissaannut inatsisissaq ukiaru oqaluuserineqassaaq
Inatsisartuni ilaasortat mittarfiit pillugit inaarutaasumik aalajangiinissaannut apeqqutit pisariaqartut aningaasaqarnermut ataatsimiititaliamit akissuteqarfiginissaat Simon Simonsenip isumalluarfigaa.
- Tassa neriuutigeqaara uanga apeqqutit amerlanerpaarpaat soorunami akineqarsinnaassasut, aamma neriuppunga siullermeerinninneru aallartinnginnerani Inatsisartuni ilaasortat isumasioqatigiinnermut annikitsumut qaaqqusimavagut, naalakkersuisoq oqarpoq.
AAMMA ATUARUK Mittarfissat nukinngullugit juulimi suliarineqassasut
