Aviisimi allaatigisaq: Mittarfinnik sanaartorniarneq akisussaassuseqanngitsuliornerulluinnarpoq
Mittarfiit sanaartorneqarnissaat 3,6 milliardit koruunit missiorlugit akeqartussaavoq - taakkulu Danmarkimit ataatsimoortumik tapiissutit ukiumut pissarsiarineqartartut amerlaqatingajappaat. Namminersornerullu oqartussaanerup ukiut 40-t matuma siorna eqqunneqarnerata kingorna suliniummut aningaasaliissutaasut annertunersaat.
AAMMA ATUARUK Mittarfiit aningaasalersornissaannut inatsit tuaviiussaq
AAMMA ATUARUK Naalakkersuisut 2,1 milliardit koruunit mittarfinnut aningaasaliissutiginiaraat
Annertuumilli misissueqqissaarinerit kingunerisassaannillu naatsorsuinerit toqqammaviginagit Inatsisartuni aalajangiiffigineqarpoq, Jens-Pavia Brandt taama allappoq. Akerlianilli Aningaasaqarnermut Siunnersuisoqatigiit Danmarkillu aningaaserivissuata Nationalbankenip mittarfiliortiternissaq mianersoqqussutigaat.
- Ajorunnannginneranik politikkikkut ilimagisaqarneq tunngavigiinnarlugu taamatut aalajangiisoqarsimatut isikkoqarpoq, Jens-Pavia Brandt taama allappoq.
AAMMA ATUARUK Aningaasanut inatsit naalagaaffimmit tapeqartariaqarnermut takussutissiivoq
Taamaammat taamatut aalajangiisoqarnera akisussaassuseqanngitsuliornerulluinnarpoq, aviisimi allaatiginnittoq taama isumaqarpoq. Danmarkimi pissutsinut sanilliutissagaanni, innuttaasut amerlassusiat najoqqutaralugu, taava mittarfiliortiternissamut aningaasat atorneqartussat assigaat ikaartarfissuit Storebæltsbrotut ittut 17-it, Jens-Pavia Brandt taama erseqqissaavoq.
Taamaammat mittarfiit politikerit kissaatigisaattut aningaasatigut siuariartornermik pilersitsinngippata, Nunatsinni aningaasaqarnikkut annertuupilussuarmik ilungersunartorsiortoqalersinnaavoq. Taamatullu pisoqassappat Danmarkip akissussaaffigissavaa Kalaallit Nunaat ikiussallugu, Jens-Pavia Brandt taama isumaqarpoq.
AAMMA ATUARUK Qaqortumi mittarfiliortoqarnissaanut misissuinerit nutaat pisariaqartut
- Qularutigineqarsinnaagunanngilaq: Danmark pisussaavoq taamatut pisoqassagaluarpat Kalaallit Nunaat ikiussallugu. Kingornalu pissusissamisuussaaq namminersorneq pillugu inatsisip nutarteqqinnissaa, aningaasatigummi ajalusoortoqassagaluarpat Kalaallit Nunaata naalakkersuisuisa ersarilluinnartumik takutissavaat nunap aqunissaa saperlugu, Jens-Pavia Brandt taama allappoq.
