Aningaasaqarnermut siunnersuisoqatigiit: Aningaasanut inatsit naalagaaffimmit tapeqartariaqarnermut takussutissiivoq

Aningaasarsiorneq ingerlalluarmat Kalaallit Nunaanni politikerit asuli atuipilunnatik aningaasanik immikkoortitsisimasariaqaraluarput. Naalakkersuisut aningaasanut politikkiata nuna piffissanut ajornakusoorfinnut ajutooqqajaangaatsialersikkaat, Kalaallit Nunaanni Aningaasaqarnermut Siunnersuisoqatigiit siulittaasuat, Torben M. Andersen oqarpoq.
 
- Aningaasarsiornerup pitsaasumik ingerlanera pinerit tamaasa oqaatigisinnaanngilaat. Sinneqartooruteqarnanilu amigartooruteqannginnera isumalluutigiuaannarsinnaanngilaat, aningaasarsiornermi ajortumik ingerlalerpat kingunissai eqqoriarsinnaavavut, Torben M. Andersen oqarpoq.
 
Taassuma aningaasanut inatsip akuerineqaqqammersup sinneqartoorutissat ukiuni sisamani 800.000 koruuniunissaannik qulakkeerisoq innersuussutigaa. Tamatumanili aaqqiissuusseqqinnissat arlallit ineqarnermut akileraartarnermullu tunngasut Inatsisartuni akuereqqaarneqarnissaat apeqqutaapput, taamaanngippammi nunatta karsiani millionilippassuarnik amigartoortoqarsinnaavoq.
 
- Isumaqarpuga tamatumani siunissami aaqqissuusseqqinnissat suli saqqummiunneqanngitsuni naammassineqanngitsunilu iluanaarutissat tunngaviginerat ajornartorsiutaasoq, Aningaasaqarnermut Siunnersuisoqatigiit siulittaasuat oqarpoq.

AAMMA ATUARUK Mittarfiliassat aningaasanut inatsit pissutigalugu kinguartinneqartut

Aaqqissuusseqqinnerit ukiuni 2018-imiit 2021-mut 100 millionit koruunit sinnerlugit iluanaaruteqarfiussapput.
 
- Aningaasat amerlapput, nalunngilarpullu amerlasuut soqutigisaqartut taakkununnga attuumassuteqartut, taamaammat taakkunani aaqqissuusseqqinnissat ajornakusoorsinnaapput. Uninngasuutitat isumalluutiginaveersaartariaqarput, sulimi nalunartoqarpoq, Torben M. Andersen oqarpoq.
 
Taannali aamma nersualaarutissaqarpoq. Taannami isumaqarpoq politikerit tungaanniit aalisarnermut akitsuutit qaffanneqarnerat silatusaarnerusoq. Isertitassat nutaat isumalluutinit akitsuutineersut nunatta karsianut 85 millionit koruuningajannik isertitaqarfiussapput.
 
- Oqartoqarsinnaavoq inuiaqatigiinni isumalluutinik peqartuni akitsuusiinermi inuiaqatigiit isumalluutinit taakkunannga pisassaqarnerat qulakkeerneqartoq. Uanilu Kalaallit Nunaat isumalluutinut akitsuutinik atuinermi maligassiuinerarneqarsinnaavoq, siulittaasoq oqarpoq.

AAMMA ATUARUK Aningaasanut inatsit akitsuutinit nutaanit 85 millionit koruuninut missingersuuteqartoq

Ajunngitsulli sukkasuumik annaaneqarsinnaasut, Aningaasaqarnermut Siunnersuisoqatigiit siulittaasuata oqaatigaa.
 
Kalaallit Nunaata namminiilivittunngornissaa naalakkersuisoqatigiinnissamut isumaqatigiissummi ilaatinneqarpoq. Aningaasanulli inatsit annikittuinnarmik sinneqartooruteqartussaq eqqarsaatigalugu Kalaallit Nunaata namminiilivinnissaanik aningaasatigullu imminut napatissinnaaneranik siunniussaqarneq aqqut isorartoorujussuussasoq Aningaasaqarnermut Siunnersuisoqatigiit siulittaasuata oqaatigaa:

- Ataatsimoortumik tapiissutinik isumalluuteqartoqarneranik takutitsiinnarpoq. Matumani iliuuserineqartut ataatsimoortumik tapiissutinit matussuserneqarput, Torben M. Andersen oqarpoq.

AAMMA ATUARUK Aningaasanut inatsit aningaasaqarnermut ajoqusiivoq