Qaqortumi mittarfiliortoqarnissaanut misissuinerit nutaat pisariaqartut

Kommune Kujalliup mittarfittaassap sanaartorneqarnissaata kinguartinneqarneranik sapaatit akunneranni kingullermi isornartorsiuneranut Kalaallit Airports A/S taama akissuteqarpoq.

Kommune Kujallermi kommunalbestyrelsi sapaatit akunneranni kingullermi tamanut ammasumik allagaqarluni Naalakkersuisut kaammattorpaa ukiuni marlunni kinguartitsineq taamaateqqullugu.

AAMMA ATUARUK Qaqortumi mittarfissap kinguaattoorneranut paasissutissat amigarnerat peqqutaavoq

Kalaallit Airports A/S nalunaaruteqarluni nassuiaavoq sumiiffimmi mittarfittaassap inissisimaffigisassaani anorlertarneranik silaannaallu aalaruluttarneranik misissuinerit pisariaqartut ingerlanneqarnissaannut piffissamut pilersaarut nutaaq periarfissiissasoq.

Ilaatigut misileraalluni sumiiffik qulaavaallugu timmisartornernik misissuisoqassaaq taakkulu siornatigut missuinernut sanilliunneqassallutik, tamannalu tunngavigalugu Qaqortumi mittarfissamut silamik pissuteqartumik piffissamik eqquisarnissamut eqqoqqissaarnerusumik uuttortaanerit naatsorsorneqarsinnaassapput, Kalaallit Airports A/S taama nassuiaavoq.

Kommune Kujallermi politikerit isornartorsiuinerat attaveqaqatigiinnermut naalakkersuisup Erik Jensenip aamma akissuteqarfigaa. Taanna ilaatigut allappoq mittarfimmut millionerpassuarnik aningaasaliisoqannginnerani piffissamik eqquisinnaanermut pissutsit inissinneqaqqaarnissaat pingaaruteqartoq.

AAMMA ATUARUK Kujalleq mittarfiliornerit kinguartinneqarnerat kamassutigigaa