Erik Jensen: Qaqortumi mittarfissap kinguaattoorneranut paasissutissat amigarnerat peqqutaavoq

Mittarfiup eqqortumik inissinneqarnissaata pitsaanerpaamik qulakkeernissaa pingaaruteqartoq, attaveqaqatigiinnermut naalakkersuisup, Erik Jensenip Kommune Kujallermi borgmesterimut, Kiisa P. Isaksenimut ammasumik akissuteqarluni allagaqarnermini allappaa.

Matumani paasissutissat tigussaasut atorlugit mittarfiliortoqassappat ukiumut ulluni 70-80-ini timmisoqarsinnaajunnaartarnissaa aarlerinarsinnaavoq, Erik Jensen nassuiaavoq.

- Mittarfimmut Narsarsuarmut naleqqiullugu annikitsuinnarmik pitsannguiffiusussamut millionerpassuarnik aningaasaliisoqannginnerani piffissamik eqquisinnaanermut pissutsit inissinneqaqqaartussaapput, Erik Jensen allappoq, taamaammallu sumi inissisimanissaanut anori silaannaallu aalarulunneranut misissuinerit allat peqqaartariaqarnerat aalajangiusimavaa.

AAMMA ATUARUK Kujalleq mittarfiliornerit kinguartinneqarnerat kamassutigigaa

Aningaasanut inatsit sapaatip akunnerata siuliani akuerineqarnerani mittarfissanut pingasunut pilersaarutit kinguartittariaqarnerat nutaarsiassarineqarmat kujataani kommune erngerluni isornartorsiuilerpoq.

- Kommune Kujallermi Kommunalbestyrelsi ataatsimoorluni sakkortunerpaamik Naalakkersuisunut noqqaassuteqarpoq Kalaallit Airports A/S piumaffigineqassasoq Qaqortumi mittarfissap tulleriiaarinermi kingullinngortinneqarnera allanngorteqqullugu, kommunalbestyrelse ammasumik allagaqarnermini allappoq.

Erik Jensenip Qaqortumi mittarfiliornissap pilersaarummit siullermit, ukiunik marlunnik kingusinnerusumi tassa 2022-mi aatsaat naammassineqarnissaanut naatsorsuuteqarneq kommunip qisuariarfigimmagu paasisinnaanerarpaa.

- Maanna Kommune Kujalliup mittarfiliassap sananeqarnissaanut qilanaarnera aammalu Naalakkersuisut aalajangiinerannut tapersersuinera ersiutitut tiguara. Qaqortumi mittarfiliornissamut ataatsimoorluta anguniagarput anguniarlugu pilersiviusumik suleqatigiinniarta, Erik Jensen allappoq.