Demokraatit: Mittarfiit aningaasartuutaajualissappata akuerisinnaanngilarput
- Akiliinerulernialertugununa immaqaluunniit inuuniarneq artornarnerulernialerpa? Apeqqummi tassaneerusaarpugut, Demokraatineersoq Nivi Olsen, oqarpoq, nangillunilu:
- Kalaallit Nunaannilu inuuniarneq akisunerulissappat taanna assut akueriuminaatsipparput.
Naalakkersuisut mittarfiliortitsinissaminni qanoq aningaasalersuissanerlutik aningaasanut inatsisissami saqqummiuppaat. Naalakkersuisut mittarfiliornissamut 1 milliardit milliardillu aappaata affaasa akornanni tigutsisissarsiussapput 2 milliardit koruuninillu taarsigassarsiniassallutik.
AAMMA ATUARUK Aningaasaliinissamut pilersaarut suli naammassinngilaq
AAMMA ATUARUK Air Greenlandip mittarfissanik aningaasalersueriaasissaq tupaallaatigaa
Aningaasat nunatta karsiata sinneqartoorutaanit, TELE-POST-ip Air Greenlandillu iluanaarutaannik PFA Soraarnermullu isertitaanit ataasiartaasunit pissarsiariniarpaat.
Taakkuali Namminersorlutik Oqartussanut inuiaqatigiinnullu akisussaqisut, nunatta aningaaserivissuata KNR-imut oqaatigereerpaa.
Air Greenlandilu amerlavallaanik aningaasaajarneqaruni, sipaarniartariaqalissaaq akilluunniit qaffattariaqalerlugit, timmisartuutileqatigiiffimmi siulersuisuni siulittaasup KNR-imut aamma erseqqissaassutigereerpaa.
AAMMA ATUARUK Sinneqartoorutinit aningaasaliissuteqarusuttut
AAMMA ATUARUK Mittarfiit aningaasartuutaajualersinnaapput
Takornariaqarnerli ineriartortinneqassappat mittarfiit pisariaqartut, Nivi Olsen isumaqarpoq. Akisunerulissappatali innuttaasunut tutsinneqannginnissaa, taassuma oqaatigaa.
- Uagut mittarfissualiornissaq isumaqataaffigaarput, nalunnginnatsigu takornariaqarneq eqqarsaatigalugu siunissamut iliuuseqartariaqartugut. Taanna apeqqusernianngilarput. Kisianni apeqqusigassarput aajuna; aningaasat qanoq naniniarpagut?
Demokraatineersoq Nivi Olsen taama oqarpoq.
