Mittarfiit aningaasartuutaajualersinnaapput

Naalakkersuisut Nuummi Ilulissanilu mittarfiit tallineqarnissaannut Qaqortumilu nutaamik mittarfiliornissamut 1 milliardit milliardillu aappaata affaasa akornanni tigutsisissarsiussapput 2 milliardit koruuninillu taarsigassarsiniassallutik.

Aningaasat nunatta karsiata sinneqartoorutaanit, TELE-POST-ip Air Greenlandillu iluanaarutaannik PFA Soraarnermullu isertitaanit ataasiartaasunit pissarsiariniarpaat.

AAMMA ATUARUK Sinneqartoorutinit aningaasaliissuteqarusuttut

Mittarfiilli pilersinneqareerlutik atulerunik imminnut akilersinnaanavianngillat. Mittarfiillumi sanartornissaannut  aningaasassarsissunneqareeraluartut, taakkua Namminersorlutik Oqartussanut inuiaqatigiinnullu akisussapput.

-  Ajornartorsiutaasoq tassaavoq mittarfiit imminnut akilersinnaanngippata, soorlu assersuutigalugu mittarfiit ukiut qulit 20-lluunniit qaangiuppata aserfallatsaaliorneqartariaqalissagaluarpata, iluarsartuunnissaannut akissaqarnavianngimmat, naalagaaffiup aningaaserivissuani siunnersorti, Anders Møller Christensen, oqarpoq.

Aserfallatsaaliuinerup saniatigut, ingerlatsineq akiitsullu 2 milliardit koruunit taarsersorneri aamma aningaasartuutaassapput. 

Aningaasartuutaasussallu taakkua billetsitigut akitsuutitigullu isertitanit  amerlanerussasut, Anders Møller Christensen naliliivoq.

AAMMA ATUARUK Imminut akilersinnaanngitsunut aningaasaliinaveersaartariaqarpugut

AAMMA ATUARUK Kalaallit Nunaanni mittarferujussuaq ataaseq naammappoq

- Taamaammallu akikinnerulersinniarlugu pisortat aningaasaataat atorneqartariaqassapput. Tassalu assigiinnarpaa pisortat ataavartumik aningaasartuutissaqartinneqalissapput, siunnersorti oqarpoq.

Mittarfinnut aningaasalersuineq inuiaqatigiinnut aamma kingunerlutsitsissaaq.

Suliffeqarfiimmi inuiaqatigiinnut pingaarutillit ukiuni tulliuttuni sinneqartoorutaat tamakkivillugit Naalakkersuisut aningaasaliissutiginiarpatigit, periarfissat ikilissasut, Anders Møller Christensen isumaqarpoq.

- Pisortat angingaasaataat atorlugit arlaannik pilersitsisoqarsinnaanavianngilaq. Aningaasammi atorneqariissapput. Mittarfiliortiternermut pituttorneqassapput, aningaasarsiornermik ilisimasalik, naalagaaffiup aningaaserivissuani siunnersorti, Anders Møller Christensen, oqarpoq.

Taavalu aamma attaveqaatinut assartuinermullu akit akitsuutillu inuussutissarsiornermut inuiaqatigiinnullu iluaqusiisussaagaluit appartinnissaat ajornakusuulissaaq.