Aqqaluaq B. Egede: Aningaasaliinissamut pilersaarut suli naammassinngilaq

Aningaasaliinissamulli siunnersuutit naammassivissimanngitsut, naalakkersuisup nassuerutigaa. 

- Pilersaarut tamakkiisumik suli naammasinikuunngilaq. Suli pilersaarut ingerlavoq, ineriartortinneqarpoq, aningaasaqarnermut naalakkersuisoq, Aqqaluaq B. Egede, oqarpoq.

Naalakkersuisut mittarfiliortitsiniarnerminni aningaasat ilaatigut nunatta karsiata sinneqartoorutaanit, TELE-POST-ip Air Greenlandillu iluanaarutaannik pissarsiariniarpaat.

AAMMA ATUARUK Mittarfiit aningaasartuutaajualersinnaapput

Mittarfiilli pilersinneqareerlutik atulerunik imminnut akilersinnaanavianngillat, naalagaaffiup aningaaserivissuani siunnersortip, Anders Møller Christensenip, KNR-imut oqaatigereerpaa.

- Taamatut siunnersuuteqarnerput inuit kaasarfiinit toqqaannartumik aallertoqannginnissaanik siunertaqarpoq taavalu aamma inuiaqatigiit atugarissaarnerulernissaannik siunertanut innarliisuunngitsumik, aningaasaqarnermut naalakkersuisoq oqarpoq.

Tamannali aningaasarsiornermik ilisimasallip illuatungilereerpaa. 

AAMMA ATUARUK Sinneqartoorutinit aningaasaliissuteqarusuttut

Suliffeqarfiimmi inuiaqatigiinnut pingaarutillit ukiuni tulliuttuni sinneqartoorutaat tamaviisa Naalakkersuisut mittarfiliortitsinermut atorniarpatigit, pisortat arlaannik pilersitsisinnaanavianngitsut, Anders Møller Christensen oqarpoq. 

Kisianni tassa Tele-Postimiit Air Greenlandimiillu aningaasanik Naalakkersuisut pissarsinngikkunik, akileraarutinik qaffaanissamik siunnersuuteqartariaqalersinnaasut, naalakkersuisoq ooqarpoq:

- Toqqaannartumik inuiaqatigiinnut oqallisigisariaqassavarput akileraarut qaffassanerlugu, mittarfik sananeqassanersoq imaluunniit sananeqassannginnersoq, Aqqaluaq B. Egede oqarpoq, nangillunilu:

- Uanilu siunnersuummi oqallisissiaavoq ingerlatseqatigiiffiit peqataatissanerigut imaluunniit allatut nutaamik suugaluarnertumik ujaaseqquneqassanerlunga uanga aningaasaqarnermut naalakkersuisutut, Aqqaluaq B. Egede oqarpoq.