Air Greenlandip mittarfissanik aningaasalersueriaasissaq tupaallaatigaa

Naalakkersuisut mittarfiliortitsiniarnerminni 1 milliardit milliardillu aappaata affaasa akornanni tigutsisissarsiussapput.  

Aningaasallu sumi pissarsiarineqassanersut inatsisissatut siunnersuummi saqqummiuppaat.

AAMMA ATUARUK Sinneqartoorutinit aningaasaliissuteqarusuttut

Assersuutigalugu Air Greenlandip iluanaarutaanik 100 millionit koruuninik pissarsiniarput. Timmisartuutileqatigiiffiulli siulersuisuisa siulittaasuat, Søren Lennert Mortensen, tupaallaaqaaq, piginneqatigiiffimmi akiliuteqarnerusussaassaaq.

300 mio. koruuninik akeqassasoq

- 100 millionit koruunit Namminersorlutik Oqartussanut tunniunniaraanni, katillugit 300 millionit koruuninik akeqassaaq, Søren Lennert Mortensen oqarpoq.

Tassami 100 millionit koruunit Namminersorlutik Oqartussanut tunniunneqassappata, taava aamma piginneqataasut marluk allat, tassaallutik SAS danskillu naalagaaffiat, amerlaqatingajaanik tunineqassapput. 

AAMMA ATUARUK Mittarfiit aningaasartuutaajualersinnaapput

Katillugillu 300 millionit koruuniungajapput.

- Akiliutissagullu amerlaqaat.

Piginneqataasut iluanaarutinik pissarserusunnerlutik namminneerlutik ataatsimoorlutik aalajangissavaat. Taamaammat Namminersorlutik Oqartussat, SAS danskillu naalagaaffiata aningaasanik pissarsiaqarnissamut isumaqatigiittariaqarput.

Akit qaffattariaqalersinnaagai

Søren Lennert Mortensenili naapertorlugu piginneqatigiiffik aningaasaajassallugu piffissatsialaanngilaq.

- Mittarfiliornissamut aningaasaleerujussartussaassaagut, timmisartusissagunarluta assigisaannillu. Iluanaarutitsinnillu immikut ittumik tunniussinissatsinnut piffissatsialaanngilaq.

Taavalu aamma timmisartuutileqatigiiffiup aningaasaqarniarneranut tamanna unammillernartuulissaaq. 

Amerlavallaanimmi aningaasaajarneqaruni, sipaarniartariaqalissaaq akilluunniit qaffattariaqalerlugit. Billetsilli akiisa qaffanneqarnissaat periarfissaanngilaq.

- Timmisartuussinikkut siunissami unammilleqatigiittoqarnerulertussaarpasitsillugu akinik qaffaaneq piviusorsiunngilaq, Søren Lennert Mortensen oqarpoq.