Mittarfiit akii isertuunneqassasut
- Naammangeqqissaanngilakka. Tassani tunngavingivara Naalakkersuisoq siunnerfimmik oqaaseqanngimmat, Múte B. Egede KNR-imut oqarpoq.
Taanna sanaartornermut ataatsimiititaliami ilaasortamit Pele Brobergimit aamma siunersiuinermi peqataasumit isumaqatigineqarpoq. Pele Broberg siunersiuinerup kingorna paasissutissanik paasisimangisaminik paasisaqarsimanngilaq.
AAMMA ATUARUK Siunersiuineq mittarfissat aningaasaqarnerannut tunngassasoq
Aningaasaqarnermut akileraartarnermullu ataatsimiititaliaq sanaartornermullu ataatsimiititaliaq siunersiuinermi peqataapput. Qaqortumi mittarfiliornissaq qanoq akeqassanersoq apeqqutigineqarpoq naalakkersuisumiilli akineqanngilaq.
- Sammineqartuni assigiinngitsuni aningaasanik taakkartuisinnaannginnerput Qaqortumi neqeroortitsinerup ingerlanneqaqqittussaaneranik peqquteqarpoq, Karl Frederik Danielsen oqarpoq.
Ilulissani Nuummilu mittarfiliornerit aallartereerput. Taakkunannga sanaartornerit qanoq akeqarnerat naalakkersuisup ammasumik oqaatigiumanngilaa. Aningaasaaqarnermulli ataatsimiititaliamut septembarip 24-ani isertuussamik oqaatigissavai.
Qaqortumi mittarfissaq naannnerusinnaasoq
Qaqortumi mittarfissamut neqeroortitsineq taamaatiinnarneqartoq aappaagu aallarteqqinneqanissaa naatsorsuutaasoq naalakkersuisoq oqarpoq. Neqeroortut missingersuutinut sanillillutik akisuallaartumik neqeroormata unitsinneqarpoq. Qaqortumi mittarfissaq naannerulersinnaasoq naalakkersuisoq aamma oqarpoq. Tamannali Inatsisartut aalajangissavaat.
Nuummi mittarfiliorneq qaammatit pingasut tikillugit kinguaattoorfiuvoq, piffissarli naammassiffissaq eqqorlugu naammassineqarnissaa naatsorsuutaalluni.
Ilulissani mittarfiliorneq suli aallartilluaraniluunniit ukiumik ataatsimik kinguaattoorfiuvoq taamaalilluni 2024-imi naammassineqarnissaa naatsorsuutaalerpoq.