Mittarfeqarfiit 2,3 millionit koruuninik siorna amigartooruteqartut
2019-imi amigartoorutit 2,3 millionit koruunit.
Mittarfeqarfiit siornamut ukiumoortumik naatsorsuutaat taama inerneqarput. Angusaalli pitsanngoriarfiusut, Mittarfeqarfiit namminneq isumaqarput.
2018-imimi amerlanerujussuarnik, tassa 26,6 millionit koruuninik, amigartooruteqarput.
AAMMA ATUARUK Mittarfeqarfiit: Aqqusaartarfiit angalasuinnarnit atorneqartassapput
- Ukiumoortumik naatsorsuutit nunatsinni ulluinnarni sulisorpassuit tunniusimalluaqalutik
sulilluarnerisa kingunerisaannik iluarisimaarnartumik pitsanngoriarput, Mittarfeqarfinni pisortaaneq Henrik Estrup oqarpoq.
Mittarfeqarfiit 2018-imut sanilliullugu 2019-imi kaaviiaartitakinnerupput.
- Kaaviiaartitat ilanngaasereerlugit ukiup siuliani 1,3 procentinik appariarput. Angallannermit isertitat 7,2
procentinik appariarput, tamatumunngalu pingaartumik aallartartut mittarfinnillu ammatitsisarnerit
ikilinerat peqqutaapput. Akunnittarfiit ineriartorneri kinguariarfiulaarput, Mittarfeqarfiit ilisimatitsivoq.
Coronap ajornartoortitsinera annaasaqaataassasoq
Ukioq mannali angusariumaakkatik, Namminersorlutik Oqartussanit pigineqartut Mittarfeqarfiit ernummatigaat.
Mittarfeqarfiimmi aningaasaqarnerat coronap ajornartoortitsineranit eqqugaarujussuassapput.
- COVID-19-ip atuunnerani ilaasartut aallartartullu ikileriangaatsiarput, taamaakkaluartorli Kalaallit
Nunaanni timmisartukkut angallassinerit qulakkeerniarlugit mittarfiit tamaasa ammatissinnaasimavagut.
Tamanna Mittarfeqarfiit akiliisinnaassusiannut annertuumik artorsartitsivoq, Henrik Estrup tusagassiutinut nalunaarummi oqarpoq.
AAMMA ATUARUK Henrik Estrup Mittarfeqarfinni pisortaaninngussaaq
Mittarfiit Kalaallit Airportsimut pigisussanngortinneqartut
Mittarfeqarfiiit namminneq aningaasaataat aamma ikilerujussuartut, ukiumoortumik naatsorsuutaanni erserpoq.
Mittarfeqarfiit 2018-imi namminneq aningaasaataat 1.344 millionit koruuniupput, 2019-imilu 23,3 millionit koruuniullutik.
Tamanna Naalakkersuisut ingerlatseqatigiiffinnut Namminersorlutik Oqartussanit pigineqartunut, aamma Mittarfeqarfinnut, atuuttunik ukiumoortumik naatsorsuusiornermut nutaanik maleruagassiornerannik peqquteqarpoq.
- I forbindelse med overgangen til disse nye regnskabsprincipper, er der gennemført en væsentlig nedskrivning af Mittarfeqarfiits anlægsaktiver, således at de i højere grad afspejler Mittarfeqarfiits indtjeningsmuligheder, siger Niels Grosen, driftsdirektør for Mittarfeqarfiit til KNR.
- Mittarfeqarfiit isertitaqarnissamut periarfissaannut naapertuunnerulersillugit pigisaat nalillit ukiumoortumik naatsorsuusiornermut nutaanik maleruagassiaqalernerata ilutigisaanik, pigisaasa sanaartukkat nalingi appartinneqangaatsiarput, Mittarfeqarfiit ingerlatsinermut pisortaat Niels Grosen KNR-imut oqarpoq.
Mittarfeqarfiit pigisaat nalillit pingaarnerit, soorlu mittarfiit, Kalaallit Airportsimut pigisussanngortinneqarnerat tamatumani peqqutaavoq. Tassami Nuummi Ilulissanilu mittarfiit angallaffiunerpaasut nutaanillu mittarfissualiorfiusut Kalaallit Airportsimut pigisassanngortinneqalerput.
Kangerlussuarmilu mittarfik aamma nalikillilerneqarsimavoq. Mittarfeqarfiit Kangerlussuarmi mittarfimmi isertitaqarluarsinnaanerisa nalorninartoqarnera tamatumani peqqutaavoq. Tassami Nuummi Ilulissanilu mittarfissuassat Kangerlussuarmi mittarfimmut kingoraartiussapput.
AAMMA ATUARUK Illersornissaqarfik Kangerlussuarmik attassiinnarnissamut 500 millioninik aningaasassarsisariaqassasoq
Illersornissaqarfiulli Kangerlussuarmi mittarfiup attanneqarnissaa kissaatigaa. Naalakkersuisut danskillu illersornissaminut ministeriata, Trine Bramsenip, Kangerlussuarmi mittarfiup nutartertariaqartup nutarterneqarnissaanik neriorsuinikuupput.
Illersornissaqarfiup Kangerlussuarmi mittarfimmik atuiinnarnissaa 550 millionit koruuninik akeqassangatinneqartoq, danskit illersornissamut ministereqarfiata nalilersimagaa, allakkiami nittartakkakkut nutaarsiassaqartitsiviup Altinget Arktisip pissarsiarisimasaani allaqqavoq.
