Mittarfeqarfiit: Aqqusaartarfiit angalasuinnarnit atorneqartassapput
Mittarfiit silataanni tikittussanik aallartussanilluunniit utaqqisut naammattuugassaasarput, taakkualu malittarisassat eqquutsippaat.
Mittarfinni aqqusaartarfiit pillugit malittarisassat tamanit eqquutsinneqarneq ajortut, Mittarfeqarfinni attaveqatigiinnermut pisortaq, Irene Jeppson oqarpoq.
- Inuit immaqa aallartuulerlutik tikittuulerlutilluunniit aqqusaartarfinnut isaasarput. Kisianni imaappoq, terminaalit aqqusaartarfiit taamaalllat angalasunit atorneqartussaapput, Irene Jeppson oqarpoq.
Coronavirusimut atatillugu killilersuinerit tamatumunnga pissutaapput. Mittarfeqarfinniillu paasititsiniaasarsimasut taassuma paasissutissiissutigaa.
Sulisut tamarmik malittarisassanik ilitsersuunneqarsimapput, aqqusaartarfiillu taamaallaat angalasunit iserfigineqartarnissaat mittarfinni allagartarsuarni allaqqavoq.
AAMMA ATUARUK Tamaat isigalugu: Coronavirus pillugu killiffik
Aamma nittartagaq aqqutigalugu quppersakkatigut assigiinngitsunik saqqummiisarsimapput. Inuilli malittarisassanik arajutsisimasinnaasarput.
- Imaassinnaavoq ilisimaneqanngitsoq, taamaattumiguna assigiinngitsunik iliuuseqartugut, Irene Jeppson oqarpoq.
Malittarisassalli paasineqarnissaat pingaartoq, attaveqaqatiginnermut pisortaq oqarpoq.
Nunattami nakorsaanerata ippassaq nalunaarutigaa, coronavirusi suli ajornartoortitsigallassasoq aappaagumullu ilanngullugu pilersaarusiulereerlutik.
- Taamaattumik naatsorsuutigisinnaavarput, mittarfeqarfinni pissutsit suli taamaakkallassasut, Irene Jeppson oqarpoq.
Aqqusaartarfinnilu ikiorneqartariaqartunut soorlu kaassuartakkaniittut, meeqqat kisimiillutik angalasut, napparsimasut allallu eqqarsaatigalugit sulisunik ikiuinissamut piareesimasoqartartoq, Irene Jeppson oqarpoq.
- Sulisoqarpugut ikiuutikutsoorsinnaasunik, arlaatigut nalorniguit imaluunniit angalaniaruit sulisugut arlaatigut apequteqarfigineqarniarunik ammapput, Irene Jeppson oqarpoq.
Mittarfeqarfinni 13-iusuni qulimiguulinnillu inissaqartitsisuni 43-ini, sulisut 450-t missaaniipput.
