Illersornissaqarfik Kangerlussuarmik attassiinnarnissamut 500 millioninik aningaasassarsisariaqassasoq
Nittartagaq Altinget.dk allagaatinik paasitinneqarsinnaatitaaneq aallaavigalugu taama allaaserisaqarpoq.
Danmarkimi illersornissaqarfiup Kangerlussuarmi mittarfik siunissami atulissaguniuk 550 millionit koruuninik aningaasaliisariaqassasoq nalilerneqarpoq.
- Kangerlussuarmi mittarfiup atorneqaannarnissaanut missingersuutit takutippaat 550 millionit koruunit missaannik aningaasaliisoqartariaqarnissaanik pisaqartitsisoqassasoq. Altinget.dk oqaaseqaat aallaavigalugu taama allaaserisaqarpoq.
AAMMA ATUARUK Naalakkersuisut Naalagaaffillu isumaqatigiipput: Illersornissaqarfik Kangerlussuarmiiginnassaaq
Kangerlussuulli mittarfia pillugu naliliineq nalorninartortaqartoq, Illersornissaqarfiup erseqqissaatigaa.
Mittarfiup attatiinnarneqarnissaanut 550 millionit koruuninik aningaasaliisoqartariaqarnissaa matumani pineqarpoq, mittarfiullu ingerlanneqarnissaanut aningaasartuutigiumaagassat ilanngunneqarsimanatik. Ingerlatsinissamut aningaasartuutit illersornissaqarfimmit matussuserneqarnissaat naatsorsuutigineqartariaqassaaq.
Kangerlussuup iluarsartuunnissaa qanoq akeqassanersoq ukiuni kingullermi arfineq-pingasuni assigiinngitsorpassuarnik eqqoriarneqartarpoq. Mittarfik tamaat assanneqassanersoq, inissiat tamarmik iluarsartuunneqassanersut imaluunniit qaavinnaat inissiallu ikitsuinnaat iluarsartuuttariaqarnersut apeqqutaalluni aningaasat 100 millionit koruuninit 1,5 milliardit koruuninut missiliorneqartarpoq.
Kangerlussuarmi mittarfik massakkutut iluseqarluni siunissami ingerlaannassappat 700 millionit koruunit pallillugit aningaasaliisoqartoqartariaqassasq, Namminersorlutik Oqartussat 2018-imi nalunaarusiaanni inerniliunneqarpoq.
Illersornissaqarfiup oqaaseqaataa Namminersorlutik Oqartussallu nalunaarusiaa mittarfiupqanoq inneranik suliffeqarfiup Swecop 2017-imi naliliineranik tunngaveqarput.
Nuummi Ilulissanilu mittarfiit pilersaarutit naapertorlugit 2023-mi naammassippata Illersornissaqarfiup Kangerlussuarmi mittarfimmik siunissami atuisinnaanissaa pillugu naalakkersuisut, Danmarkimi naalakkersuisunik septembarimi isumaqatigiissusiorput.
AAMMA ATUARUK Kangerlussuaq-aftale vækker håb i bygdebestyrelsen
Nuummi Ilulissanilu mittarfiit naammassippata inuinnaat Kangerlussuarmik atuinerisa annikillingaatsiarnissaa naatsorsuutigineqarpoq, aningaasanillu sipaarniarluni Kangerlussuarmi mittarfiup annikillisarneqarnissaa naatsorsuutigineqarpoq. Mittarfiulli atorneqaannarnissaa illersornissaqarfiup kissaatigaa.
Naalakkersuisut Danmarkimilu naalakkersuisut isumaqatigiissutaata immikkuualuttortaasa misissorneqarnissaat pillugu suleqatigiissitanik assigiinngitsunik pilersitsisoqarpoq.
