Kangerlussuaq pillugu isumaqatigiissut: Nunaqarfiup aqutsisui nuannaajallattut
Siunissamili Kangerlussuarmi mittarfeqarfiup suliffeqarfiillu allat sulisuisa ikinnerulernissaat ilisimaarineqareermat oqaloqatigiinnerit qanoq inerneqassanersut pissanganartoqartippaat.
Kangerlussuup siunissami Illersornissamut minnistereqarfimmiit atorneqaannarnissaa pillugu tunngaviusumik isumaqatigiissuteqartoqarnera nunaqarfiup aqutsisuinut nuannaajallatsitsivoq.
-Qujaruttorujussuuarput taamak atsioqatigiinneq Kangerlussuup taamak attatiinnarneqarnissaa aaliangiunneqarmat.
Nunaqarfimmi aqutsisut siulittaasuat, Knud Olsen (S) oqarpoq.
AAMMA ATUARUK Peqatigiiffik: Kangerlussuup takornariaqarneq inuussutissarsiornermut inerisassavaa
Ilulissani Nuummilu 2023-mi mittarfissuaqalerpat Kangerlussuarmi mittarfiup atorneqarnera ullumikkorniit annikillisussaasoq nunaqarfiup aqutsisuisa qularutiginngilaat.
-Kangerlussuup atorneqarnera soorunami killeqalissaaq. Taavalu kisianni Qeqqata kommunea, taamatullu takornarialerinermik sullissisut qanoq niuillaqqinnertik takutinniartariaqarpaat Kangerlussuup atorluarneqarnissaa qulakkeerneqassappat, Knud Olsen oqarpoq.
Pissangasut
Kangerlussuarmi innuttaasut massakkut 511-iupput. Taakkua amerlanersaat tassa aasakkut amerlanerpaagaangamik 150-it Kangerlussuup Mittarfeqarfiani sulisarput. Sulisut qanoq ikileriartigissanersut aqutsisut pissangallutik suli utaqqissangavaat.
-Pissanganartoraa taanna. Soorunami atorneqarnerput annikillisussaavoq, Knud Olsen oqarpoq.
Kangerlussuaq nunaqarfiugami pisiniarfeqarpoq, meeqqat atuarfeqarluni, meeqqeriveqarlunilu. Taakua qanoq siunissaqassanersut massakkut aamma akissutissaqartinneqanngikkallarpoq.
AAMMA ATUARUK Illersornissaqarfik Kangerlussuup ingerlanneranut akiliisussaasoq
-Isumaqatigiiniarnerup ingerlanerata taakkua aaliangivissortussaavai tamakkua eqqartoriikkatit qanoq ingerlasinnaanersut. Soorunami pisariaqartinneqartuassapput inoqartillugu suliffeqartillugulu tamakkua. Soorunami allatuulli annikillissaput atorneqarneri, Knud Olsen oqarpoq.
Neriulluartoqarporli.
-Qeqqata kommunea pilersaaruteqarami talittarfiliornissamik. Taamatullu aamma aqqusinermik pilersitsiniarneq siunertaammat neriuutigilluinnarparput annaasaqarnissarput angisoorujussuunani nutaaliortoqarneratigut ingerlallualersinnaasasoq, nunaqarfimmi aqutsisut siulittaasuat, Knud Olsen oqarpoq.
Kangerlussuaq pillugu tunngaviusumik isumaqatigiissuteqarneq nunaqarfimmiunut toqqissiallaatiginerussagaat Ilinniartitaanermut Nunanullu Allanut Naalakkersuisoq, Ane Lone Baggerip neriutigaa. Aamma illersornissamut ministerilu Kangerlussuarmi innuttaasunik piffissami qaninnermi ataatsimiititsinisssaq pilersaarutigigitsik, Ane Lone Bagger oqarpoq.
